कृषी विभागातील गैरव्यवहाराची होणार चौकशी

पुणे, ता. २५ : कृषी विभागातील विविध योजनांमध्ये झालेल्या गैरव्यवहारांची तक्रारींमुळे चौकशी होणार आहे, तसेच काही शासकीय अधिकाऱ्यांनी बेकायदा स्थापन केलेल्या कृषी निविष्ठा, विक्री केंद्रे आणि उत्पादक कंपन्यांबाबत गंभीर तक्रारी समोर आल्याने राज्य शासनाने हा चौकशीचा निर्णय घेतला आहे. या पार्श्वभूमीवर प्रशासकीय सेवेतून निवृत्त झालेले वरिष्ठ अधिकारी डॉ. उमाकांत दांगट यांच्याकडे चौकशीची जबाबदारी सोपविण्यात आली आहे.
कृषी विभागातील विविध योजनांमधील गैरव्यवहार तसेच शासकीय अधिकारी आणि कर्मचाऱ्यांनी बेकायदा सुरू केलेल्या कृषी निविष्ठा, उत्पादक कंपन्या आणि विक्री केंद्रांबाबत आक्षेप नोंदविण्यात आले होते. आमदार सुरेश धस यांनीही त्यासंदर्भात तक्रारी केल्या आहेत. गैरव्यवहारासंदर्भातील मुद्दा त्यांनी विधानसभेतही उपस्थित केला होता. या सर्व प्रकाराची चौकशी समकक्ष अधिकाऱ्यांकडून करण्याचे शासनाच्या विचाराधीन होते, मात्र तक्रारींमधील मुद्द्यांची व्याप्ती मोठी असल्याने, त्याचबरोबर कृषी विभागातीलच काही वरिष्ठ अधिकाऱ्यांची नावे समाविष्ट असल्याने कार्यरत वरिष्ठ अधिकाऱ्यांना चौकशीसाठी नियुक्त केल्यास नियमित कामकाजावर त्याचा परिणाम होण्याची शक्यता होती. हे लक्षात घेऊन निवृत्त आणि अनुभवी अधिकाऱ्याच्या हाती चौकशी सोपविण्याचा निर्णय झाला.

चौकशीसाठी महिनाभराचा कालावधी
कृषी विभागातील योजनांमध्ये झालेल्या गैरव्यवहारांबाबत तक्रारींचे स्वरूप गंभीर असल्याने त्वरित आणि स्वतंत्र चौकशीची गरज निर्माण झाली होती. भारतीय प्रशासकीय सेवेतून निवृत्त झालेले अनुभवी अधिकारी डॉ. दांगट यांची कृषी आयुक्तांनी शिफारस केली होती. त्यांच्याकडे चौकशीची जबाबदारी सोपविली आहे. कृषी, पशुसंवर्धन, दुग्ध व्यवसाय विकास व मत्स्य व्यवसाय विभागाने डॉ. दांगट यांची नियुक्ती अधिकृतपणे मंगळवारी (ता. २४) जाहीर केली. या सर्व प्रकारांची सखोल चौकशी करून एक महिन्यात राज्य शासनाला अहवाल देण्याचे निर्देश दिले आहेत.