‘सारथी’ला भरपूर निधी; ‘महाज्‍योती’वर अन्‍याय
पुणे, ता. १८ : बहुजन घटकांतील विद्यार्थ्यांना शैक्षणिक व व्यावसायिक संधी उपलब्ध करून देण्‍यासाठी असलेल्‍या ‘महाज्‍योती’ व इतर मागासवर्गीय वित्‍त आणि विकास महामंडळाला निधी वाटप करताना अर्थमंत्री अजित पवार दुजाभाव करत आहेत. ओबीसींच्‍या तुलनेत कमी असलेल्‍या मराठा व कुणबी विद्यार्थ्यांसाठी असलेल्‍या ‘सारथी’ व ‘अण्णासाहेब पाटील आर्थिक विकास महामंडळ’ यांना मात्र भरभरून निधी दिला जात आहे. येत्‍या काळात ‘महाज्‍योती’ व ‘मागासवर्गीय वित्‍त मंडळा’ला दीड हजार कोटी रुपये न दिल्‍यास आंदोलन करण्‍याचा इशारा ओबीसी नेते लक्ष्‍मण हाके व मंगेश ससाणे यांनी बुधवारी पत्रकार परिषदेत दिला.
यावेळी ससाणे यांनी अर्थ खात्‍याने ‘सारथी’, ‘अण्णासाहेब पाटील महामंडळ’ यांना दिलेला निधी व ‘महाज्‍योती’, ‘इतर मागासवर्गीय वित्‍त आणि विकास महामंडळ’ यांना दिलेला निधीची तुलनात्‍मक आकडेवारी सादर करत अर्थ खाते बहुजनांच्‍या विद्यार्थ्यांवर अन्‍याय करत असल्‍याचा आरोप केला. तसेच ‘महाज्‍योती’च्या विद्यार्थ्यांसाठी ‘सारथी’च्या कार्यालयातील दोन मजले द्यावेत, अशीही मागणी केली. ससाणे म्हणाले, ‘‘अर्थमंत्री अजित पवार हे बहुजनांसाठीच्‍या संस्‍थेला निधी वाटप करताना हात आखडता घेतात. ‘सारथी’चे पुण्‍यात व इतर जिल्ह्यांत चकचकीत कार्यालये आहेत. त्‍यांना वेगवेगळ्या जिल्ह्यांमध्ये कार्यालयांसाठी १० हेक्‍टर जमीन व आतापर्यंत १३६० कोटी रुपयांचा निधी दिला आहे. तसेच ‘अण्णासाहेब पाटील महामंडळ’ यांना एक हजार ६३ कोटी रुपयांचे कर्ज दिले आहे. दुसरीकडे ‘महाज्‍योती’चे एका हॉलमध्‍ये कार्यालय असून, आतापर्यंत केवळ त्‍यासाठी सुमारे दीडशे कोटी रुपयांचा निधी व मागासवर्गीय वित्‍त विकास महामंडळाला केवळ ३९८ कोटी रुपये कर्जपुरवठा केला आहे.’’
हाके, ससाणे म्हणाले...
- ‘सारथी’च्या विद्यार्थ्यांना संशोधनासाठी नऊ लाखांचा स्‍टायपेंड
- मागासवर्गीय विद्यार्थी संशोधकांना मात्र स्‍टायपेंड मिळत नसल्‍याने शिक्षण सोडावे लागते
- आतापर्यंत ५५५ विद्यार्थ्यांनी फेलोशिप सोडून दिली
- अर्थमंत्री अजित पवार सामाजिक न्यायासाठी दुय्यम वागणूक देत आहेत
- त्‍यांच्‍या हातात हातात सत्तेच्या आणि तिजोरी चाव्या आहेत, म्हणून हा दुजाभाव केला जात आहे
- जे ओबीसी आमदार, खासदार व मंत्री आहेत त्‍यांनी या विषयाकडे लक्ष घालावे
- ‘महाज्‍योती’लादेखील ‘सारथी’च्या तुलनेत चारपट निधी द्यायला हवा
- अन्‍यथा येणाऱ्या स्‍थानिक स्‍वराज्‍य संस्‍थांच्‍या निवडणुकांमध्‍ये ‘ओबीसी’ची ताकद दाखवून देऊ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.