विश्वशांतीसाठी सामूहिक प्रयत्नांची गरज : मुकेश खन्ना

पुणे, ता. २९ : ‘‘संपूर्ण जगात अशांतता माजली आहे. साम्राज्यवादी देशात युद्धाची स्पर्धा अधिकच वाढली आहे. युद्ध हे कोणत्याही समस्येवर उपाय नाही. अहिंसा आणि विश्वशांतीसाठी सर्वांनी एकत्रित प्रयत्न करणे गरजेचे आहे,’’ असे विचार ज्येष्ठ अभिनेते मुकेश खन्ना यांनी व्यक्त केले.
‘एमआयटी’ विश्वशांती विद्यापीठाच्या वतीने आयोजित ३० व्या तत्त्वज्ञ संत श्री ज्ञानेश्वर आणि संत श्री तुकाराम महाराज स्मृती व्याख्यानमालेत खन्ना बोलत होते. या वेळी ज्येष्ठ शास्त्रज्ञ डॉ. अरविंद नातू, रंगनाथ नाईकडे, डॉ. बी.एस. नागोबा, ‘दूरदर्शन’चे माजी कार्यकारी अधिकारी डॉ. मुकेश शर्मा, ‘एमआयटी’चे संस्थापक अध्यक्ष डॉ. विश्वनाथ कराड, डॉ. दीपेंद्र शर्मा, डॉ. भरत चौधरी आदी उपस्थित होते.
खन्ना म्हणाले, ‘‘आजची मुले ही उद्याचे भविष्य आहेत. मोबाईलच्या आभासी जगात ही मुले खूप गुंतल्याने ती अधिक अस्वस्थ आहेत. मोबाईलच्या अतिवापरापासून त्यांना दूर ठेवणे हे मोठे आव्हान आहे. त्यासाठी नैतिकतेची शिकवण देणारी संस्कृती जोपासना करणारी शिक्षण व्यवस्था आणायला हवी.’’
डॉ. नातू म्हणाले, ‘‘विज्ञान आणि अध्यात्म या एकाच नाण्याच्या दोन बाजू आहेत. विज्ञान मानवी आरोग्यासाठी कृत्रिम औषध उपचार देते. अध्यात्म हे ध्यानधारणा, योगासने याद्वारे प्राकृतिक आरोग्य उपचार देते. अलीकडे लोकांचे मानसिक आरोग्य धोक्यात आले आहे. सामाजिक आणि मानसिक स्वास्थ्यासाठी अध्यात्म हा एकमेव उपाय आहे.’’
कार्यक्रमाचे प्रास्ताविक डॉ. मिलिंद पात्रे यांनी, तर सूत्रसंचालन प्रा. सचिन गाडेकर यांनी केले.