स्मार्ट इंडिया हॅकेथॉनची महाअंतिम फेरी पुण्यात

पुणे, ता. ४ : केंद्रीय शिक्षण मंत्रालय, अखिल भारतीय तंत्रशिक्षण परिषद आणि इनोव्हेशन सेल (शिक्षण मंत्रालय) यांच्या संयुक्त विद्यमाने आयोजित ‘स्मार्ट इंडिया हॅकेथॉन २०२५’ची (सॉफ्टवेअर एडिशन) महाअंतिम फेरी पुण्यात होणार आहे. येत्या सोमवारी (ता. ८) सकाळी ८ ते मंगळवारी (ता. ९) रात्री ८ अशी सलग ३६ तास ही हॅकेथॉन रंगणार आहे.
‘होप फाउंडेशन अँड रिसर्च सेंटर’ संचलित ‘इंटरनॅशनल इन्स्टिट्यूट ऑफ इन्फॉर्मेशन टेक्नॉलॉजी’ (आयस्क्वेअरआयटी) येथे ही फेरी होणार असून, त्यात देशभरातून दाखल झालेल्या २५ संघांचा थरार पाहायला मिळणार असल्याची माहिती ‘आयस्क्वेअरआयटी’च्या प्राचार्या डॉ. वैशाली पाटील यांनी गुरुवारी (ता. ४) पत्रकार परिषदेत दिली. यावेळी ‘आयस्क्वेअरआयटी’च्या विश्‍वस्त अमृता कटारा, उपप्राचार्या प्रा. माधुरी रेड्डी, प्रा. रवींद्र जोशी, स्मार्ट इंडिया हॅकेथॉनचे प्रा. प्रकाश क्षीरसागर व प्रा. मंदार दातार उपस्थित होते.
स्मार्ट इंडिया हॅकेथॉन ही केंद्रीय शिक्षण मंत्रालयाच्या इनोव्हेशन सेल आणि ‘एआयसीटीई’ यांच्या संयुक्त विद्यमाने २०१७ मध्ये सुरू केलेली राष्ट्रीय स्तरावरील स्पर्धा आहे. जगातील सर्वांत मोठ्या ओपन इनोव्हेशन मॉडेलपैकी एक असलेल्या या स्पर्धेत विद्यार्थ्यांना विविध मंत्रालये, विभाग, उद्योग आणि सामाजिक क्षेत्राला भेडसावणाऱ्या समस्यांवर उपाय शोधण्यासाठी एक व्यासपीठ उपलब्ध करून देण्यात येते, अशी माहिती डॉ. पाटील यांनी दिली.