दोन लाखांची खंडणी; महिलेविरुद्ध गुन्हा दाखल

पुणे, ता. ४ : ‘माझ्यासोबत लग्न कर, नाहीतर दोन लाख रुपये दे; अन्यथा तुझ्यावर बलात्काराचा गुन्हा दाखल करते,’ अशी धमकी देत एका महिलेने दोन लाख रुपयांची खंडणी मागितल्याचा प्रकार समोर आला आहे. या महिलेने यापूर्वीही उच्च न्यायालयात वकील असल्याचे भासवून कोल्हापूर जिल्ह्यातील चंदगडमधील एका व्यक्तीची फसवणूक केल्याप्रकरणी कोथरूड पोलिस ठाण्यात गुन्हा दाखल आहे.
हा प्रकार घोरपडी येथील बी. टी. कवडे रस्ता परिसरात १५ सप्टेंबर ते १ डिसेंबर या कालावधीत घडला. याप्रकरणी संबंधित व्यक्तीने (वय ३७, रा. मुंढवा) तक्रार दिली आहे. त्यानुसार त्या महिलेविरुद्ध (वय ३८, रा. कोथरूड) मुंढवा पोलिस ठाण्यात गुन्हा दाखल करण्यात आहे. पोलिसांनी दिलेल्या माहितीनुसार, आरोपी महिलेने त्या व्यक्तीशी ओळख वाढवून स्वतःला उच्च न्यायालयात वकिली करत असल्याचे सांगितले. तक्रारदाराच्या पत्नीने दाखल केलेल्या खटल्यात मदत करू, असे सांगत तिने त्यांच्याशी जवळीक वाढवली. मात्र, तिने दिलेल्या लग्नाच्या प्रस्तावाला तक्रारदाराने नकार दिला. त्यानंतर आरोपी महिलेने तक्रारदार आणि त्यांच्या आईला फोन करून शिवीगाळ केली. ‘माझ्यासोबत लग्न न केल्यास दोन लाख रुपये दे; अन्यथा तुझ्यावर बलात्काराचा गुन्हा दाखल करते,’ अशी धमकी दिल्याचे तक्रारीत म्हटले आहे. पुढील तपास सहाय्यक पोलिस निरीक्षक राजू महानोर करीत आहेत.