‘शांतता पुणेकर वाचत आहेत’मध्ये व्हा सहभागी

पुणे, ता. ४ ः पुणे पुस्तक महोत्सवाच्या अंतर्गत ‘शांतता पुणेकर वाचत आहेत’ हा उपक्रम आयोजित केला जातो. वाचन संस्कृतीला बळकटी देणारा हा उपक्रम असून नऊ डिसेंबर रोजी सकाळी ११ तो १२ या वेळेत नागरिकांनी सहभाग घ्यावा. विद्यार्थ्यांना प्रोत्साहन देण्यासाठी शाळा, महाविद्यालयात वाचन व्हाऊचर्स दिले जाणार आहेत, असे राज्‍याचे उच्च व तंत्रशिक्षण मंत्री चंद्रकांत पाटील यांनी सांगितले
पुणे पुस्तक महोत्सवाच्या निमित्ताने केले सावित्रीबाई फुले पुणे विद्यापीठात कुलगुरू, संस्थाचालक आणि प्राचार्यांची बैठक आयोजित केली होती. त्यावेळी ते बैठकीत बोलत होते. यंदाच्या महोत्सवात सांस्कृतिक कार्यक्रम, चिल्ड्रन कॉर्नर, लिट फेस्टिव्हल, विविध प्रकाशनांचे भव्य पुस्तक स्टॉल्स आणि फूड फेस्टिव्हल यांचा समावेश आहे. ‘शांतता...पुणेकर वाचत आहेत’ हा खास उपक्रम नऊ डिसेंबर रोजी सकाळी ११ ते दुपारी १२ या वेळेत होणार आहे. या एक तासात संपूर्ण पुणे शांततेत वाचन करणार आहे. नागरिकांना या उपक्रमात उत्साहाने सहभागी व्हावे. विद्यार्थ्यांना प्रोत्साहन देण्यासाठी प्रत्येक महाविद्यालय आणि विद्यार्थ्यांना व्हाऊचर दिले जाणार असून त्यातून वाचन संस्कृतीला चालना मिळेल, असे ही पाटील यांनी सांगितले.
यावेळी राष्ट्रीय पुस्तक न्यासाचे संचालक युवराज मलिक यांनी पुणे हे ‘ऑक्सफर्ड ऑफ द ईस्ट’ नव्हे तर ‘पश्चिमेकडील नालंदा’ म्हणून ओळखले जावे यासाठी आपले प्रयत्न आहेत असे सांगितले.
महोत्सवाचे प्रमुख संयोजक राजेश पांडे यांनी पुस्तक महोत्सवातील विविध उपक्रमांची माहिती यावेळी दिली. राज्याचे उच्च शिक्षण संचालक शैलेंद्र देवळाणकर यांनी विद्यापीठे, महाविद्यालये आणि युवकांनी मोठ्या संख्येने वाचन मोहिमेत सहभागी व्हावे तसेच महाविद्यालयांत विविध स्पर्धा व उपक्रम राबवून वाचन संस्कृती वाढवावी, असे आवाहन बैठकीत केले. या वेळी महोत्सवात उच्च शिक्षण विभागाचा स्टॉलही असणार आहे असे सांगितले.
सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांनी उपस्थितांचे स्वागत केले. यावेळी कुलसचिव डॉ. ज्योती भाकरे, प्र-कुलगुरू डॉ. पराग काळकर, रवी शिंगणापूरकर, प्राचार्य डॉ. नितीन घोरपडे, देविदास वायदंडे, ज्योत्स्ना एकबोटे, प्राचार्या डॉ. संगीता जगताप आदी उपस्थित होते. कार्यक्रमाचे सूत्रसंचालन डॉ. संजय चाकणे यांनी केले.