टी ॲण्ड टी इन्फ्राची ‘साम’वर आज यशोगाथा

पुणे, ता. ६ ः पायाभूत क्षेत्रातील दमदार कंपनी असलेल्या ‘टी ॲण्ड टी इन्फ्रा लिमिटेड’ची यशोगाथा ‘महाब्रँड्स’मधून मांडण्यात येणार आहे. महाराष्ट्रीयन ब्रँड्ना सलाम करणारा हा कार्यक्रम साम टीव्हीवर प्रसारित केला जाणार आहे. त्या अंतर्गत रविवारी (ता. ७) दुपारी तीन वाजून ३० मिनिटांनी ‘टी ॲण्ड टी इन्फ्रा लिमिटेड’चा प्रवास साम टीव्हीवर प्रसारित केला जाणार आहे.
प्रबळ इच्छाशक्ती असलेले सोलापूर आणि सातारा जिल्ह्यातील दोन तरुण इंजिनिअर्स योगायोगाने एकत्र येतात. कष्ट करण्याची तयारी दाखवितात आणि तीस वर्षापूर्वी लावलेल्या ‘टी ॲण्ड टी इन्फ्रा लिमिटेड’ नामक रोपट्याचे वटवृक्षात रूपांतर करतात. कोणत्याही मराठी माणसाचा ऊर अभिमानाने भरून येईल, असा श्रीमंत तांदूळकर आणि शिवराम थोरवे या मित्रद्वयीचा हा खडतर व प्रेरणादायी प्रवास. दोघांच्या अथक परिश्रमातून २००४ मध्ये स्थापन झालेल्या ‘टी ॲण्ड टी ग्रुप’चे २०१२ मध्ये ‘टी ॲण्ड टी इन्फ्रा प्रा. लि. आणि २०१८ ला ‘टी ॲण्ड टी इन्फ्रा लिमिटेड’ मध्ये रूपांतर होऊन त्याला एक कॉर्पोरेट ओळख मिळाली.