किसान प्रदर्शनाला मोशीत उद्यापासून प्रारंभ

पुणे, ता. ८ : आधुनिक तंत्रज्ञान व नवे विचार शेतकऱ्यांपर्यंत पोहोचण्यासाठी ‘किसान’ या देशव्यापी प्रदर्शनाचे आयोजन बुधवार (ता. १०) ते रविवार (ता. १४) दरम्यान सकाळी ९ ते सायंकाळी ५ या वेळेत पिंपरी-चिंचवडमधील मोशी येथील आंतरराष्ट्रीय प्रदर्शन व संमेलन केंद्र येथे केले आहे, अशी माहिती संयोजक निरंजन देशपांडे यांनी पत्रकार परिषदेत दिली. यावेळी प्रदर्शनाचे व्यवस्थापक नीलेश शेळके उपस्थित होते.
या प्रदर्शनात ६०० हून अधिक कंपन्या, संशोधन संस्था व नवउद्योजक शेतीतील नवीन तंत्रज्ञान व उत्पादने सादर करतील. किसान प्रदर्शनाला केंद्र सरकारच्या कृषी व शेतकरी कल्याण मंत्रालय, राज्याचा कृषी विभाग, सावित्रीबाई फुले पुणे विद्यापीठातील जैवतंत्रज्ञान विभागाने सहकार्य केले आहे. यंदा किसान प्रदर्शनात संरक्षित शेती, पाणी नियोजन, कृषी निविष्ठा, यंत्रसामग्री, पशुधन, जैव, ऊर्जा, वाटिका, शेती व लघु उद्योग अशी विभागवार दालने असतील.
देशपांडे म्हणाले, ‘‘किसान प्रदर्शनाचे उद्‍घाटन शेतकऱ्यांच्या हस्ते होणार आहे. यात आंतरराष्ट्रीय उत्पादने आणि कृषी व्यवसायाविषयी माहिती जाणून घेण्याची संधी मिळेल. तसेच शेतकऱ्यांसमोरील ताणतणाव, भावनिक स्वास्थ्य आणि मानसिक आरोग्याशी संबंधित आव्हानांवर प्रदर्शनाच्या माध्यमातून लक्ष केंद्रित केले जाईल.’’