मॉडेल कॉलनीत घरफोडीत तीन लाखांचे दागिने लंपास

पुणे, ता. १२ : शिवाजीनगर येथील मॉडेल कॉलनी परिसरात चोरट्यांनी बंद सदनिकेचे कुलूप तोडून तीन लाख रुपयांचे सोन्याचे दागिने चोरी केल्याची घटना घडली. या प्रकरणी चतुःशृंगी पोलिस ठाण्यात गुन्हा दाखल करण्यात आला आहे.
तक्रारदार ज्येष्ठ नागरिक कोथरूड परिसरातील भुसारी कॉलनीत वास्तव्यास आहेत. त्यांची चुलत बहीण मॉडेल कॉलनीतील एका सोसायटीत कुटुंबासह राहते. गोव्यात पर्यटनासाठी गेल्यामुळे सदनिका बंद होती. याच संधीचा फायदा घेत चोरट्यांनी सोमवारी पहाटे साडेचारच्या सुमारास पहिल्या मजल्यावरील सदनिकेचे कुलूप तोडले. कपाट उचकटून चोरट्यांनी तीन लाख रुपयांचे सोन्याचे दागिने लंपास केले. गुरुवारी (ता. ११) सायंकाळी घरफोडी उघडकीस आली.
या घटनेची माहिती मिळताच वरिष्ठ पोलिस निरीक्षक उत्तम भजनावळे आणि सहाय्यक निरीक्षक अनिकेत पोटे यांनी घटनास्थळी पाहणी केली. पोलिसांनी सोसायटी परिसरातील सीसीटीव्ही चित्रीकरण ताब्यात घेतले असून, सहाय्यक निरीक्षक पोटे पुढील तपास करीत आहेत.