‘युनि-टेक ऑटोमेशन’कडून पूरग्रस्तांसाठी १० लाखांची मदत

पुणे, ता. ९ ः शिवणे येथील इलेक्ट्रॉनिक उत्पादने क्षेत्रात १९९६ पासून कार्यरत असलेल्या ‘युनि-टेक ऑटोमेशन प्रायव्हेट लिमिटेड’ कंपनीतर्फे सामाजिक उत्तरदायित्व निधीअंतर्गत पूरग्रस्तांसाठी ‘सकाळ रिलीफ फंड’ला १० लाख रुपयांचा मदतीचा धनादेश सुपूर्त करण्यात आला. या वेळी कंपनीच्या मुख्य स्ट्रॅटेजिक ऑफिसर ऐश्वर्या भुजबळ-लडकत, एचआर प्रमुख गणेश इघे, असिस्टंट जनरल मॅनेजर बिझनेस अँड डेव्हलपमेंट अमोल साबळे व सिस्टम्स अँड प्रोसेस मॅनेजर अपूर्वा भुजबळ उपस्थित होते.
राज्यातील व प्रामुख्याने मराठवाड्यातील पूरग्रस्तांच्या मदतीसाठी कंपनीतील सर्व कर्मचारी वर्गाने एक दिवसाचे वेतन आणि काही ऐच्छिक रक्कम संकलित केली. यासाठी कंपनीचे मुख्य कार्यकारी अधिकारी लक्ष्मण कटक्कर यांनी पुढाकार घेतला. कर्मचारी वर्गाकडून संकलित झालेल्या निधीच्या रकमेइतकीच रक्कम कंपनी व्यवस्थापनाने जमा करून एकूण १० लाख रुपयांची देणगी कंपनीकडून देण्यात आली आहे. ‘युनि-टेक ऑटोमेशन’ कंपनीतर्फे सातत्याने पर्यावरण संवर्धनासाठी व नैसर्गिक आपत्तीने प्रभावित झालेल्या घटकांच्या पुनर्वसनासाठी कार्य केले जाते. यामध्ये वृक्षारोपण, स्वच्छता अभियान, रक्तदान शिबिरे, स्वयंसेवी संस्थांना जीवनावश्यक वस्तू आणि शैक्षणिक साहित्याचे वाटप आदी उपक्रम आयोजित केले जातात.