रमेश व स्वाती खरमाळे यांना मारुती चितमपल्ली पुरस्कार

पुणे, ता. ९ : पर्यावरण, वन्यजीवन व निसर्गसेवा क्षेत्रात कार्यरत असणाऱ्या व्यक्तींना साहित्य संमेलनाचे माजी अध्यक्ष मारुती चितमपल्ली यांच्या सन्मानार्थ देण्यात येणारा ‘ॲडव्हेंचर फाउंडेशन’चा ‘मारुती चितमपल्ली निसर्गमित्र पुरस्कार’ यंदा जुन्नर तालुक्यातील निसर्गसंवर्धक रमेश खरमाळे आणि स्वाती खरमाळे या दांपत्यास देण्यात येणार आहे.
रमेश खरमाळे यांनी लष्करी सेवा पूर्ण करून निवृत्तीनंतर जुन्नर परिसरात निसर्ग संवर्धन आणि रक्षणाचे कार्य हाती घेतले. गेल्या १२ वर्षांहून अधिक काळ त्यांनी आपल्या पत्नीसमवेत ‘पाणी अडवा-पाणी जिरवा’ हे ध्येय डोळ्यांसमोर ठेवून हजारो देशी वृक्षांची लागवड करत प्राणवायू निर्माण करणारी उद्याने विकसित केली. त्यांच्या या कार्याची दखल घेत राष्ट्रपती आणि पंतप्रधानांनी त्यांना आमंत्रित करून विशेष गौरव केला आहे.
पुरस्काराचे वितरण पर्वतीतील मित्रमंडळ चौकाजवळील श्री महालक्ष्मी सभागृहात शनिवारी (ता. १३) सायंकाळी सहा वाजता गोखले इन्स्टिट्यूट ऑफ पॉलिटिक्स अँड इकॉनॉमिक्सच्या शाश्वत विकास केंद्राचे संचालक गुरुदास नूलकर यांच्या हस्ते होईल. या वेळी प्रमुख पाहुणे म्हणून सामाजिक वनीकरण विभागाचे प्रधान वनसंरक्षक विवेक खांडेकर उपस्थित राहणार असून, वनविभागाचे निवृत्त प्रधान वनसंरक्षक सुनील लिमये अध्यक्षस्थानी असतील.