भरधाव रिक्षा उलटून चालकाचा मृत्यू

पुणे, ता. ९ : पर्वती गाव परिसरात भरधाव रिक्षा उलटून रिक्षाचालकाचा मृत्यू झाल्याची घटना सोमवारी मध्यरात्री घडली. लखन रामू अवघडे (वय २५, रा. भवानी पेठ) असे मृत्युमुखी पडलेल्या रिक्षाचालकाचे नाव आहे. याबाबत पोलिस हवालदार विवेक आदक यांनी पर्वती पोलिस ठाण्यात फिर्याद दिली आहे. पोलिसांनी दिलेल्या माहितीनुसार, चार डिसेंबर रोजी रात्री पावणेबाराच्या सुमारास लखन अवघडे रिक्षा घेऊन पर्वती गाव परिसरातून जात होता. श्रद्धा ऑप्टिकल दुकानासमोर त्याचे रिक्षावरील नियंत्रण सुटल्याने रिक्षा रस्त्यावर उलटली. या अपघातात अवघडे याच्या डोक्याला गंभीर दुखापत झाली. अपघाताची माहिती मिळताच पोलिसांनी तत्काळ घटनास्थळी धाव घेतली. गंभीर जखमी अवस्थेत अवघडेला तातडीने रुग्णालयात दाखल करण्यात आले; मात्र उपचारादरम्यान त्याचा मृत्यू झाला.