हडपसरमध्ये पाच दुचाकी जप्त

पुणे, ता. ९ : हडपसर परिसरात दुचाकी चोरणाऱ्या रवींद्र शिवाजी घाटे (वय ४०, रा. दहिवाडी, ता. तुळजापूर, जि. धाराशिव) याला पोलिसांनी अटक केली. त्याच्याकडून चार दुचाकी जप्त करण्यात आल्या. याशिवाय एका अल्पवयीन मुलाला ताब्यात घेऊन त्याच्याकडून एक दुचाकी जप्त केली आहे.
हडपसर परिसरातील दुचाकी चोरीचे गुन्हे उघडकीस आणण्यासाठी पोलिसांचे पथक चोरट्यांचा शोध घेत होते. दरम्यान, पोलिस अंमलदार रविकांत कचरे यांना आरोपी रवींद्र घाटे याच्याबाबत माहिती मिळाली. तपासाच्या अनुषंगाने पोलिसांनी लातूर, बार्शी आणि तुळजापूर परिसरात शोधमोहीम राबवून घाटे याला ताब्यात घेतले. त्याच्याकडून चोरीच्या चार दुचाकी जप्त केल्या. तसेच, एका अल्पवयीन मुलाकडून पोलिसांनी एक दुचाकी जप्त केली.
पोलिस उपायुक्त डॉ. राजकुमार शिंदे, सहाय्यक आयुक्त अनुराधा उदमले यांच्या मार्गदर्शनाखाली वरिष्ठ पोलिस निरीक्षक संजय मोगले, पोलिस निरीक्षक (गुन्हे) नीलेश जगदाळे, उपनिरीक्षक हसन मुलाणी, सत्यवान गेंड, अविनाश गोसावी, संदीप राठोड, दीपक कांबळे, सचिन जाधव, बापू लोणकर, अमित साखरे, निखिल पवार, अमोल दणके, नीलेश किरवे यांनी ही कारवाई केली.