‘एनएमएमएस’ परीक्षेची प्रवेशपत्र संकेतस्थळावर

पुणे, ता. ९ : महाराष्ट्र राज्य परीक्षा परिषदेमार्फत राष्ट्रीय आर्थिक दुर्बल घटकातील इयत्ता आठवीतील विद्यार्थ्यांसाठी शिष्यवृत्ती योजना परीक्षा (एनएमएमएस) २८ डिसेंबरला होणार आहे. या परीक्षेसाठी प्रवेशपत्र (हॉल तिकीट) परीक्षा परिषदेच्या ‘www.mscepune.in’ आणि ‘https://mscenmms.in/’ या संकेतस्थळावर उपलब्ध करून दिले आहे.
राज्यात ७५८ केंद्रांवर ही परीक्षा घेण्यात येणार असून, त्यासाठी १३ हजार ७८९ शाळा आणि दोन लाख ५० हजार ५४४ विद्यार्थ्यांनी नोंदणी केली आहे. विद्यार्थ्यांना प्रवेशपत्र उपलब्ध करून देण्याची जबाबदारी संबंधित शाळेच्या मुख्याध्यापकांची आहे. प्रवेशपत्रात विद्यार्थ्यांचे नाव, वडिलांचे नाव, आडनाव, आईचे नाव यामधील स्पेलिंग दुरुस्ती असल्यास तसेच जन्मतारीख, जात, आधारकार्ड आदींमध्ये दुरुस्ती असल्यास २७ डिसेंबरपर्यंत संबंधित शाळेच्या लॉगिनमध्ये ऑनलाइन अर्ज उपलब्ध करून देण्यात आले आहेत. कोणत्याही परिस्थितीत पूर्ण नावात बदल केला जाणार नाही. ऑनलाइन आलेल्या अर्जाव्यतिरिक्त टपाल, समक्ष अथवा ई-मेल आदी कोणत्याही पद्धतीने पाठविलेल्या दुरुस्त्या तसेच दिलेल्या मुदतीनंतर प्राप्त झालेल्या दुरुस्ती अर्जांचा विचार केला जाणार नाही. या दुरुस्त्या परीक्षा झाल्यानंतर करणार आहेत, असे महाराष्ट्र राज्य परीक्षा परिषदेने सांगितले आहे.