पुणे - नाशिक रेल्वे मार्गासंदर्भात पंतप्रधानांना भेटणार

पुणे, ता. ११ ः पुणे - नाशिक नव्या रेल्वे मार्गामुळे जुन्नर, आंबेगाव, खेड तालुक्याच्या विकासावर परिणाम होणार आहे. ‘जीएमआरटी’चे कारण सांगून रेल्वे प्रशासनाने हा मार्ग बदलला. २००१ मध्ये पहिल्यांदा या मार्गाचे सर्वेक्षण केले. त्यानंतर अनेकदा याच मार्गाने सर्वेक्षण केले. तेव्हा ‘जीएमआरटी’चा अडथळा आला नाही. आता अचानक कसा अडथळा होतो? हा प्रश्न उपस्थित करून लवकरच मुख्यमंत्री देवेंद्र फडणवीस व पंतप्रधान नरेंद्र मोदी यांना भेटणार असल्याचे माजी खासदार शिवाजीराव आढळराव पाटील यांनी पत्रकार परिषदेत सांगितले.

पुणे - नाशिक राष्ट्रीय महामार्गावर सध्या वाहतूक कोंडीची मोठी समस्या आहे. पुण्याहून मंचरपर्यंत जाण्यासाठीच साडेतीन तासांचा वेळ लागतो. पुणे - नाशिक रेल्वेचा पूर्वीचा मार्ग असता तर या रेल्वे मार्गामुळे निश्चितच प्रवाशांना दिलासा मिळाला असता. मात्र, नव्या मार्गामुळे प्रवासाचा अंतर व वेळ वाढणार आहे. त्यामुळे दिलासा मिळणार नाही. शिवाय नव्या मार्गामुळे जुन्नर, आंबेगाव, खेड तालुक्यातील नागरिकांवर मोठा अन्याय होणार आहे. तांत्रिक कारणामुळे पूर्वी खेड येथे होणारे विमानतळ रद्द करावे लागले. खेड ते सिन्नर रस्ते प्रकल्पाविषयीदेखील अनास्था दाखवली गेली. आता रेल्वे मार्गाबाबतीत देखील हेच झाले. मी सरकारच्या विरोधात नाही, मात्र काही प्रशासकीय अधिकारी जाणीवपूर्वक प्रकल्पांना विरोध करीत आहेत. पुणे - नाशिक रेल्वे मार्गासंदर्भात पुढच्या आठवड्यात मुख्यमंत्री देवेंद्र फडणवीस, तसेच पंतप्रधान नरेंद्र मोदी यांची भेट घेऊन रेल्वे मार्गासंदर्भात चर्चा करणार असल्याचे आढळराव पाटील यांनी सांगितले.