दोषींवर सदोष मनुष्यवधाचा गुन्हा दाखल करावा ः शिवसेना

पुणे, ता. ११ ः हडपसर येथील सह्याद्री रुग्णालय प्रशासनाच्या निष्काळजीपणामुळे एका रुग्णाला प्राण गमवावे लागले. रुग्णांच्या नातेवाइकांची केलेली दिशाभूल यास सर्वस्वी सह्याद्रीचे प्रशासन जबाबदार आहे, असा आरोप शिवसेनेच्या वैद्यकीय विभागाचे प्रमुख मंगेश चिवटे यांनी गुरुवारी केला आहे. रुग्णालयाने वैद्यकीय शिष्टाचार पाळले नसल्याने या मृत्यू प्रकरणाची सखोल चौकशी करावी, तसेच दोषींवर सदोष मनुष्यवधाचा गुन्हा दाखल करावा, अशी मागणी त्यांनी या वेळी केली.

सह्याद्री हॉस्पिटलच्या हडपसर शाखेत शस्त्रक्रियेदरम्यान शिवसेना वैद्यकीय मदत कक्षाचे पुणे शहरप्रमुख अजय सकपाळ यांचे वडील केरू सकपाळ यांचा मृत्यू झाला. त्यामुळे संतप्त शिवसेनेच्या कार्यकर्त्यांनी रुग्णालयाची तोडफोड केली. या प्रकरणाबाबत मुख्यमंत्री देवेंद्र फडणवीस, उपमुख्यमंत्री अजित पवार व एकनाथ शिंदे आणि आरोग्यमंत्री प्रकाश आबिटकर यांची भेट घेण्यात येणार आहे. रुग्णालयाच्या संपूर्ण उपचार प्रक्रियेचा तत्काळ तपास करावा, रुग्णाच्या मृत्यूचे कारण शोधण्यासाठी स्वतंत्र वैद्यकीय तज्ज्ञ समिती नियुक्त करावी, उपचारादरम्यान निष्काळजीपणा आढळल्यास हॉस्पिटल प्रशासनावर कारवाई करण्यात यावी, अशा मागण्या केल्या जाणार असल्याचे चिवटे यांनी सांगितले.