शिवरायांच्या पूर्णाकृती पुतळ्याचे उद्या अनावरण

खडकवासला, ता. १३ : धायरीत साकारत असलेली ‘शिवशंभू सृष्टी’ ही केवळ एक भव्य वास्तुरचना नसून स्वराज्याच्या इतिहासाला जिवंतपणा देणारा गौरवशाली अध्याय ठरणार आहे. या ठिकाणी छत्रपती शिवाजी महाराजांच्या राजदंडाधिष्ठित पूर्णाकृती पुतळ्याचे अनावरण रविवारी (ता. १४) सायंकाळी सहा वाजता होणार आहे.
हा सोहळा स्वराज्याची संकल्पना, राजसत्तेची प्रतिष्ठा आणि छत्रपती शिवाजी महाराजांच्या महान कर्तृत्वाचे प्रभावी दर्शन घडविणारा ठरणार आहे. या पुतळ्याचे उद्‍घाटन केंद्रीय राज्यमंत्री मुरलीधर मोहोळ आणि आमदार भीमराव तापकीर यांच्या हस्ते होणार आहे. या उपक्रमाची संकल्पना युवा नेते किशोर पोकळे आणि माजी नगरसेविका अश्‍विनी पोकळे यांची आहे. या उपक्रमानिमित्त सोमवारी (ता. १५) सायंकाळी सहा वाजता प्रा. नितीन बानगुडे यांचे ‘शिव व्याख्यान’ आयोजित करण्यात आले आहे. त्याचबरोबर ‘अवघे अवघे शिवशंभो गर्जना’ या कार्यक्रमांतर्गत गायक अभिजित जाधव आणि अमू जाधव यांचे सादरीकरण होणार आहे.