पुण्यात दोन दिवसांत थंडी ओसरणार

पुणे, ता. १४ : शहरात गेल्या काही दिवसांपासून सातत्याने किमान तापमानात लक्षणीयरीत्या घट नोंदविण्यात येत आहे. परिणामी शहरात गेल्या पाच दिवसांपासून किमान तापमान १० अंश सेल्सिअसच्या खाली नोंदविण्यात येत आहे. त्यामुळे पुणेकर अक्षरशः गारठून गेले आहेत. मात्र पुढील दोन दिवसांत किमान तापमानामध्ये किंचित वाढ होण्याची शक्यता भारतीय हवामानशास्त्र विभागाने वर्तविली आहे. त्यामुळे शहरातील थंडी ओसरण्याची शक्यता आहे.
पुणे आणि परिसरात रविवारी (ता. १४) कमाल तापमानामध्ये दोन अंश सेल्सिअसची नोंद करण्यात आली, तर किमान तापमानात किंचित वाढ झाली. रविवारी कमाल तापमान ३१ अंश सेल्सिअस, तर किमान तापमान ९.४ अंश सेल्सिअस इतके नोंदविण्यात आले. आकाश दिवसभर निरभ्र आणि कोरड्या वातावरणामुळे दिवसभर हवेत गारवा जाणवत आहे. उपनगरांमध्ये थंडीचा कडाका अधिक तीव्र आहे, तर पुढील दोन दिवसांत कमाल तापमान आणि किमान तापमानात किंचित वाढ होणार असल्याचे हवामानशास्त्र विभागाने सांगितले आहे.
पुणे आणि परिसरामध्ये सोमवारी (ता. १५) किमान तापमानात किंचित वाढ होणार असून १० अंश सेल्सिअस, तर कमाल तापमान ३१ अंश सेल्सिअस इतके नोंदविण्यात येणार आहे. आकाश मुख्यतः निरभ्र राहून सकाळी विरळ धुके पडण्याची शक्यता आहे. तर बुधवारपासून (ता. १७) कमाल आणि किमान तापमानात किंचित वाढ होण्याची शक्यता आहे. कमाल तापमान ३२ अंश सेल्सिअसपर्यंत, तर किमान तापमान ११ अंश सेल्सिअसपर्यंत नोंदविण्यात येणार आहे. आकाश मुख्यतः निरभ्र राहण्याची शक्यता हवामानशास्त्र विभागाने वर्तविली आहे.