गदिमांच्या गाण्यांनी दिला सुसंस्कृतपणा सुहास जोशी यांचे गौरवोद्गार ः गदिमा प्रतिष्ठानच्या पुरस्कारांचे वितरण
पुणे, ता. १४ ः ज्या कुटुंबात हिंदी गाणी म्हणणे निषिद्ध मानले जायचे आणि केवळ शास्त्रीय गायनालाच प्राधान्य दिले जायचे. त्यावेळी गदिमांच्या लेखणीचा प्रभाव असल्याने त्यांची गाणी आम्ही मुक्तपणे म्हणायचो. गदिमा केवळ गीतकार म्हणूनच नव्हे तर ते एक कलाकार म्हणूनही महान होते. गदिमांच्या गाण्यांनी सुसंस्कृतपणा दिला, असे गौरवोद्गार ज्येष्ठ अभिनेत्री सुहास जोशी यांनी व्यक्त केले.
ग. दि. माडगूळकर यांच्या स्मरणार्थ गदिमा प्रतिष्ठानतर्फे देण्यात येणारा यंदाचा गदिमा पुरस्कार सुहास जोशी यांना ज्येष्ठ अभिनेते मोहन जोशी यांच्या हस्ते प्रदान करण्यात आला. त्यावेळी त्या बोलत होत्या. महाराष्ट्र साहित्य परिषदेचे कार्याध्यक्ष प्रा. मिलिंद जोशी, डॉ. श्रीपाद जोशी, गदिमा प्रतिष्ठानचे कार्यकारी विश्वस्त आनंद माडगूळकर, उत्कर्ष प्रकाशनाचे संचालक सु. वा. जोशी उपस्थित होते. यावेळी गृहिणी सखी सचिव पुरस्कार वंदना गांगुर्डे, चैत्रबन पुरस्कार लेखक, दिग्दर्शक, अभिनेते नागराज मंजुळे, विद्या प्रज्ञा पुरस्कार गायिका मुग्धा वैशंपायन यांना प्रदान करण्यात आला. यावेळी आनंद माडगूळकर लिखित व उत्कर्ष प्रकाशनातर्फे प्रकाशित ‘माझ्या खिडकीतून गदिमा’ या पुस्तकाचे प्रकाशन करण्यात आले.
सुहास जोशी म्हणाल्या, ‘‘गदिमा कलाकार म्हणूनही महान होते. नैसर्गिक अभिनय कसा असावा, याचे मूर्तिमंत उदाहरण ते होते. वऱ्हाडी आणि वाजंत्री या वगातील त्यांचा अभिनय पुढच्या पिढीसाठी अनुकरणीय असाच होता. तो वग करण्यासाठी त्यांनी खास वऱ्हाडी भाषेचा अभ्यास केला. गदिमांना संपूर्ण महाराष्ट्रातील जवळपास सगळ्याच बोलीभाषा येत होत्या. मुग्धा वैशंपायनच्या रूपाने गदिमांची गाणी गाणारी ही चौथी पिढी आहे.’’
मोहन जोशी म्हणाले, ‘‘पु. भा. भावे हे पक्के हिंदुत्ववादी, गदिमा हे काँग्रेस विचारांचे, तर बाबूजी हे कट्टर संघाच्या विचारांचे अशी वैचारिक तफावत असताना देखील या तिघांमधील मैत्रीचे बंध दृढ होते.’’
नागराज मंजुळे म्हणाले, ‘‘गदिमांनी आपले जगणे समृद्ध केले आहे. लोकोत्तर व्यक्तिमत्त्व असलेल्या व डोंगराएवढे काम करून ठेवलेल्या व्यक्तीच्या नावाने मला हा पुरस्कार मिळाल्याचा आनंद आहे.’’
माडगूळकर यांनी पुरस्कार देण्यामागील भूमिका विशद केली. राजेश दामले यांनी सूत्रसंचालन केले. प्रकाश भोंडे यांनी आभार मानले.
.................
फोटो ः 76573
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.