वाढलेल्या इच्छुकांमुळे नेत्यांचा कस लागणार भाजपकडून नेमके काय निकष लावले जाणार, याकडे अनेकांचे लक्ष

पुणे, ता. १४ ः महापालिका निवडणुकीसाठी भाजपकडे प्रत्येक प्रभागामधून इच्छुकांची संख्या मोठ्या प्रमाणात वाढल्याने आता पक्षाच्या नेत्यांचा कस लागणार आहे. उमेदवार निवडण्यासाठी पक्ष नेमके काय निकष लावणार, यावरून आता तर्कवितर्क लढविले जाऊ लागले आहेत.
शहर भाजपकडून गेल्या आठवड्यात महापालिका निवडणुकीसाठी इच्छुकांना अर्ज वाटप करण्यात आले. सुमारे अडीच हजार इच्छुकांनी पक्षाकडून अर्ज नेले. त्यानंतर बहुतांश इच्छुकांनी तत्काळ अर्ज भरून दिले. दरम्यान, नागपूर येथे सुरू असलेल्या हिवाळी अधिवेशनामध्ये पक्षाचे मंत्री, शहरातील आमदार, तर संसदेच्या अधिवेशनामध्ये पक्षाचे मंत्री व शहरातील खासदार गुंतले आहेत. त्यामुळे औपचारिकता म्हणून शहर पातळीवरील नेत्यांकडून अर्ज वाटपानंतर शनिवारपासून इच्छुकांच्या मुलाखती घेण्यास सुरवात करण्यात आली. शनिवारी व रविवारी दोन्ही दिवशी इच्छुकांनी पक्ष कार्यालयात मोठ्या संख्येने उपस्थिती लावून मुलाखती दिल्या.
शहरातील काही प्रभागांमध्ये उमेदवारी खेचून आणण्यासाठी मोठ्या प्रमाणात चुरस होण्याची शक्‍यता आहे. डेक्कन जिमखाना-हॅपी कॉलनीमध्ये (प्रभाग २९) सर्वाधिक ७१, त्यापाठोपाठ नवी पेठ-पर्वतीसाठी (प्रभाग २७) ६०, कसबा-केईएम रुग्णालय (प्रभाग २४) या प्रभागासाठी ५८, शिवाजीनगर-मॉडेल कॉलनीसाठी (प्रभाग १२) ५५, तर शिवणे-खडकवासला (प्रभाग ३३) या प्रभागासाठी ५० इतक्‍या प्रमाणात इच्छुकांनी अर्ज केले आहेत. त्यापाठोपाठ प्रभाग ७ व २६ मध्ये ४९, १० मध्ये ४७, प्रभाग २० व २३ मध्ये ४८, ३८ मध्ये ४५, ३१ मध्ये ४४ व ३० मध्ये ४३ या प्रभागामध्येही मोठ्या संख्येने इच्छुकांनी अर्ज दाखल केले आहेत. शहरातील काही प्रभागांमध्ये उमेदवारी खेचून आणण्यासाठी मोठ्या प्रमाणात चुरस होण्याची शक्‍यता आहे.
पक्षाने अर्ज वाटप सुरू करण्यापूर्वीच पक्षाच्या कोअर कमिटीची बैठक झाली होती. यामध्येही इच्छुकांची संख्या वाढण्याची शक्‍यता व्यक्त करून उमेदवार निवडीबाबतच्या निकषांवरून खडाजंगी झाली होती. त्यावेळी पक्षातील एका ज्येष्ठ नेत्याने इच्छुकांची वाढती संख्या लक्षात घेऊन त्यांना समजावून सांगण्याची किंवा त्यांची समजूत काढण्याची जबाबदारी कोणीतरी घ्यायला पाहिजे, अशी भूमिका मांडली होती. उमेदवाराची गुन्हेगारी पार्श्‍वभूमी आहे का? चारित्र्य चांगले आहे का ? उमेदवार पक्षाशी एकनिष्ठ आहे का ? कुटुंबामध्ये राजकीय संबंध आहेत का ? इच्छुक उमेदवार आपल्या पक्षाबाहेरील तर नाही ना ? उमेदवाराची निवडून येण्याची क्षमता आहे का ? या स्वरूपाचे निकष लावण्याच्या सूचना बैठकीमध्ये केल्या असल्याची माहिती सूत्रांनी दिली.
--------------
मुलाखतीसाठी दुसऱ्या दिवशीही गर्दी
भाजप कार्यालयात शनिवारी इच्छुकांच्या मुलाखतींना सुरवात झाली. शहराध्यक्ष धीरज घाटे, माजी मंत्री दिलीप कांबळे व माजी सभागृहनेते श्रीनाथ भिमाले यांनी मुलाखती घेतल्या. शनिवारप्रमाणेच रविवारी दिवसभर इच्छुकांनी पक्ष कार्यालयाबाहेर मुलाखतींसाठी गर्दी केली होती. कुटुंबीय व मित्र-मंडळींसमवेत त्यांनी मुलाखतीसाठी हजेरी लावली.
-----------