वानवडीत मीटरला आग; दुचाकी, मोटारी खाक

पुणे, ता. १६ : वानवडी भागात सोसायटीच्या तळमजल्यावर वीज मीटरला आग लागल्याने तेथे लावलेल्या दोन मोटारी व दोन दुचाकी जळाल्या. या घटनेत कोणीही जखमी झाले नाही.
अग्निशमन दलाने दिलेल्‍या माहितीनुसार, वानवडीतील साळुंके विहार रस्त्यावर मेस्ट्रोज सोसायटीच्‍या तळमजल्‍यावर वीज मीटरला आग लागली. त्यात दोन मोटारींसह दोन दुचाकींनी पेट घेतला व त्या जळाल्या. सोसायटीच्या आवारात मोठ्या प्रमाणावर धूर झाला. यावेळी अग्निशमन यंत्रणा कार्यान्वित करून आग आटोक्यात आणण्याचा प्रयत्न करण्यात आला. शॉर्टसर्किटने आग लागल्याची शक्यता अग्निशमन दलाच्या अधिकाऱ्यांनी व्यक्त केली.

दीड लाखांच्या
साड्यांची चोरी
पुणे, ता. १६ : औंध परिसरातील एका वस्त्रदालनातून साड्यांसह इतर दीड लाख रुपयांच्या साहित्याची चोरी झाल्याचा प्रकार उघडकीस आला. याप्रकरणी एका कामगार महिलेविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार महिलेचे आशिष रेसिडेन्सी सोसायटीत तळमजल्यावर वस्त्रदालन (बुटीक) आहे. या दालनात काम करणाऱ्या महिलेने गेल्या काही महिन्यांत साड्या व अन्य साहित्य चोरून नेले. तक्रारदार महिलेच्या लक्षात हा प्रकार आल्यानंतर त्यांनी चतु:शृंगी पोलिसांकडे तक्रार दिली. आणखी एका घटनेत बालेवाडीतील हायस्ट्रीट परिसरातील एका सोसायटीत घरकाम करणाऱ्या दोन महिलांनी एक लाख ८० हजार रुपयांचे दागिने चोरून नेल्याचा प्रकार उघडकीस आला. याबाबत एका महिलेने बाणेर पोलिस ठाण्यात फिर्याद दिली आहे.