भारतात अस्थिरतेसाठी अमेरिका, चीन प्रयत्नशील : प्रवीण दीक्षित

पुणे, ता. १६ : ‘‘भारताच्या सुरक्षेपुढे आव्हान निर्माण करण्यासाठी अमेरिका, चीन यांसह अन्य काही शक्तीशाली देश प्रयत्नशील आहेत. भारताचे तुकडे करणे, भारताला अंतर्गत गोष्टीत गुंतवून ठेवणे, यासाठी त्या शक्ती पाकिस्तानचा वापर करत आहेत. पाकिस्तान हे एक प्यादे आहेत. पाकिस्तानचा वापर केला जातो,’’ असे मत राज्याचे माजी पोलिस महासंचालक प्रवीण दीक्षित यांनी व्यक्त केले.
पुणे पुस्तक महोत्सवातील ‘लिट फेस्ट’मध्ये ‘राष्ट्रीय सुरक्षेसमोरचे धोके’ विषयावर दीक्षित व माजी पोलिस महासंचालक जयंत उमराणीकर यांची मुलाखत झाली. यावेळी योगेश परळे यांनी त्यांच्याशी संवाद साधला. दीक्षित म्हणाले, ‘‘जन सुरक्षा कायदा हा समाजातील गंभीर आणि वारंवार गुन्हे करणाऱ्या व्यक्तींवर नियंत्रण ठेवण्यासाठी आवश्यक आहे. मात्र, हा कायदा अतिशय जबाबदारीने आणि मर्यादित वापरासाठीच लागू केला गेला पाहिजे. कायद्याचा गैरवापर टाळणे, नागरिकांचे मूलभूत हक्क अबाधित ठेवणे आणि कारवाई पारदर्शक असणे अत्यावश्यक आहे.’’
उमराणीकर म्हणाले, ‘‘सुरक्षेबाबत आपल्याला कायमच जागरूक राहावे लागेल. दिल्ली बॉम्ब स्फोट झाला. त्याच्या आधी गुप्तचर यंत्रणांनी प्रचंड मोठा कट उधळून लावला. तीन हजार किलो स्फोटके जप्त केली. हे गुप्तचर यंत्रणांचे मोठे यश होते.’’ यावेळी सीमा भागातील तणाव, दहशतवाद, सायबर गुन्हे, अंतर्गत सुरक्षेतील बदलते स्वरूप यावर वक्त्यांनी विचार मांडले.