अध्यक्षासह अन्य पदांसाठी महिला आरक्षण

पुणे, ता. १६ : शहरातील वकिलांची संघटना असलेल्या पुणे बार असोसिएशनच्या (पीबीए) अध्यक्षपदासह उर्वरित जागांसाठी महिला आरक्षण निश्चित करण्यात आले आहे. तसेच दर तीन वर्षांनी महिलांसाठी अध्यक्षपद आरक्षित ठेवण्यात यावे, असा ठराव मंगळवारी झालेल्या वार्षिक सर्वसाधारण सभेत करण्यात आला.
उपाध्यक्ष, सचिव आणि खजिनदार पदासाठी एक जागा वाढवून ती महिलांसाठी राखीव असेल. कार्यकारिणी सदस्य संख्या वाढून त्यामध्ये पाच जागा महिलांसाठी राखीव असतील, असा देखील ठराव करण्यात आला आहे. ठराव मंजूर होताच महिला वकीलांनी गुलाल उधळून पेढे भरवत आनंद व्यक्त केला. ‘पीबीए’चे अध्यक्ष ॲड. हेमंत झंजाड यांच्या अध्यक्षतेखाली ही सभा पार पडली. शिवाजीनगर येथील जिल्हा व सत्र न्यायालयातील अशोका सभागृहात पार पडलेल्या सभेवेळी उपाध्यक्ष समीर भुंडे, सुरेखा भोसले, सचिव पृथ्वीराज थोरात, भाग्यश्री गुजर-मुळे, सदस्य माधवी पवार, प्रसाद निगडे यांच्यासह पदाधिकारी उपस्थित होते. याप्रसंगी ज्येष्ठ वकील सुधाकर आव्हाड, महाराष्ट्र आणि गोवा वकील परिषदेचे सदस्य ॲड. राजेंद्र उमाप, सदस्य ॲड. हर्षद निंबाळकर, ॲड. के. टी. आरू, ॲड. मंगेश लेंडघर, ॲड. राणी कांबळे-सोनावणे, ॲड. शिरीष शिंदे, ॲड. रवींद्र शिंदे, ॲड. विजयसिंह निकम यांनी मनोगत व्यक्त केले.

सभेत झालेले ठराव....
- ‘पीबीए’कडील तीन कोटींच्या ठेवींवरील व्याजातून वकिलांच्या हितासंबंधी कामे व्हावीत
- धर्मादाय आयुक्त कार्यालयातील बार संबंधित प्रकरणे तडजोडीतून मिटवावीत
- नवीन इमारतीत पीबीएसाठी सुमारे १५ हजार चौरस फूट जागा मिळविण्यासाठी प्रयत्न व्हावे
- सभासदांना उर्वरित फी भरण्याची विनंती करून आजीव सभासद करून घ्यावे

‘पीबीए’ने घेतलेला हा निर्णय ऐतिहासिक आहे. तो समताधिष्ठित आणि दूरदृष्टीचा आहे. महिलांचा कायदे क्षेत्रातील वाढता सहभाग लक्षात घेता त्यांना नेतृत्वाच्या संधी देणे आवश्यक होते. दर तीन वर्षांनी अध्यक्षपद महिलांसाठी राखीव ठेवण्याचा ठराव हा केवळ आरक्षणापुरता मर्यादित नसून, सक्षम नेतृत्व घडविण्याच्या दिशेने टाकलेले पाऊल आहे.
- ॲड. हेमंत झंजाड,
अध्यक्ष, पुणे बार असोसिएशन