‘भीम-गीत’ गायन स्पर्धेत चेतन आमटेचा प्रथम क्रमांक

पुणे, ता. १७ : रामभाऊ म्हाळगी प्रबोधिनीतर्फे वैयक्तिक गायकांसाठी आयोजित ‘भीम - गीत’ गायन स्पर्धेत चेतन आमटे या स्पर्धकाने प्रथम क्रमांक पटकावला. अमोल घोडके याने द्वितीय तर विद्या घनेधर हिने तृतीय क्रमांक पटकावला.

ही स्पर्धा सोमवार आणि मंगळवारी पार पडली. या स्पर्धेत राज्यातील २४ जिल्ह्यांतील ७५ गायकांनी सहभाग घेतला होता. डॉ. बाबासाहेब आंबेडकर यांच्या जीवनकार्यावर, चरित्रावर आणि त्यांच्या एकूण संघर्षावर आधारित गीतांचे सादरीकरण स्पर्धकांनी केले. मंगळवारी सायंकाळी ज्येष्ठ साहित्यिक डॉ. शरणकुमार लिंबाळे यांच्या हस्ते पारितोषिक वितरण झाले. याप्रसंगी प्रबोधिनीचे उपाध्यक्ष डॉ. विनय सहस्रबुद्धे, स्पर्धेचे परीक्षक संगीतकार कौशल इनामदार, गायक नंदेश उमप, तबलावादक मोहन पारसनीस, लोककलेचे अभ्यासक संतोष मोरे आदी उपस्थित होते.
प्रथम क्रमांक विजेत्याला ५० हजार रुपये, द्वितीय क्रमांकाला ३५ हजार आणि तृतीय क्रमांकाला २५ हजार रुपये तसेच प्रमाणपत्र व मानचिन्हांनी सन्मानित करण्यात आले. उत्तेजनार्थ पहिला क्रमांक आम्रपाली पगारे, दुसरा प्रथमेश गायकवाड, तिसरा श्रीरंग कुलकर्णी, चौथा नितीन गायकवाड आणि पाचवा क्रमांक स्वप्नील साळवे यांनी पटकावला.

डॉ. सहस्रबुद्धे म्हणाले, ‘‘डॉ. आंबेडकर यांचे स्मरण करणारी गीते ही ठरावीक प्रकारच्या गायकांच्या किंवा ठरावीक प्रकारच्या श्रोत्यांच्या चौकटीत अडकवू नयेत. डॉ. आंबेडकर हे सर्व समाजाचे असल्याने समाजातील सर्व घटकांतील कलाकारांनी ही गाणी गावीत आणि सर्व स्तरातील लोकांनी ऐकावीत, अशा सामाजिक अभिसरणाच्या उद्देशातून या स्पर्धेचे आयोजन केले होते.’’
डॉ. लिंबाळे यांनी स्पर्धेचे कौतुक केले. कौशल इनामदार यांनी मार्गदर्शन केले.