बालभारती पाठ्यपुस्तकांची अनधिकृतरीत्या छपाई करणाऱ्यांवर कारवाई

पुणे, ता. १७ : महाराष्ट्र राज्य पाठ्यपुस्तक निर्मिती व अभ्यासक्रम संशोधक मंडळाच्या (बालभारती) पाठ्यपुस्तकांची अनधिकृतरीत्या छपाई नागपूरमध्ये होत असल्याची धक्कादायक बाब उघडकीस आली आहे. नागपूरमधील मे. प्रतिभा प्रिंटर्समध्ये बालभारतीच्या इयत्ता दहावीच्या पाठ्यपुस्तकांची अनधिकृतरीत्या छपाई होत होती. हा प्रकार निदर्शनास येताच संबंधित प्रिंटर्सवर कारवाई करण्यात आली आहे.
बालभारतीच्या पाठ्यपुस्तकांची अनधिकृतरीत्या छपाई होत असल्याचे बाब समजताच बालभारतीच्या नागपूर भांडारातील अधिकारी आणि कर्मचारी यांनी प्रत्यक्ष पाहणी करण्यासाठी छपाईच्या ठिकाणी भेट दिली. यावेळी संबंधित ठिकाणी इयत्ता दहावीच्या पाठ्यपुस्तकांच्या जवळपास दहा हजार प्रती अनधिकृतरीत्या छापल्याचे आढळून आले. हा संपूर्ण साठा सीलबंद करण्याचे काम सुरू आहे. या प्रकरणाबाबत पोलिस तक्रार दाखल करण्यात आली आहे.

पाठ्यपुस्तकांची अनधिकृत छपाई झाल्याचा प्रकार लक्षात येताच पोलिसांच्या मदतीने त्वरित कारवाई करण्यात आली आहे. संबंधितांवर गुन्हा नोंदविण्यात आला आहे. भविष्यात असे प्रकार निदर्शनास आल्यास बालभारतीकडून कडक कारवाई करण्यात येईल.
- अनुराधा ओक, संचालक, बालभारती