पुण्यात थंडीची लाट ओसरणार

पुणे, ता. १७ ः थंडीच्‍या कडाक्यामुळे गेल्या दोन आठवड्यापासून गारठलेल्‍या पुणेकरांना थोडा दिलासा मिळण्याची चिन्‍हे आहेत. सलग दुसऱ्या दिवशी शहरासह उपनगरातील किमान तापमानात एक ते दीड अंशाने वाढ झाली आहे. त्यामुळे थंडीची लाट ओसरत असून अनेक भागांत कडाक्याच्या थंडीचा जोर कमी झाला आहे. बुधवारी (ता. १७) हवेली परिसरात सर्वांत कमी नऊ अंश सेल्सिअस किमान तापमानाची नोंद झाल्‍याची माहिती हवामानशास्‍त्र विभागाने दिली.
गेल्‍या दोन आठवड्यापासून शहरात थंडीचा कडाका कायम आहे. या काळात किमान तापमान सात अंशापर्यंत खाली आले होते. गेल्या तीन ते चार दिवसांत किमान तापमान कमी-अधिक होत असले तरी थंडीचा कडाका कायम होता. मात्र, सलग दुसऱ्या दिवशी शहरातील किमान तापमानात वाढ झाली असून, हवेली वगळता शहरासह जिल्ह्यातील सर्व भागांत किमान तापमान १० ते १३ अंशावर गेले. त्यामुळे पहाटे आणि रात्री थंडीचा जोर कमी झाला आहे.
यामध्‍ये हवेली परिसरासह पाषाण, शिवाजीनगर परिसरात किमान तापमानात एक ते दीड अंशाने वाढ झाली आहे. शहरातील अनेक भागांतील नऊ अंशावरील थंडीचा पारा १० ते ११ अंशावर पोचला. जिल्ह्यातही १३ ते १४ अंशावर असलेला पारा १६ अंशाच्या पुढे नोंदविला. त्यामुळे दुपारीही जाणवणारी थंडी गायब झाली असून, बुधवारी उन्हाच्या हलक्याशा चटक्याने पुणेकरांना थंडीपासून दिलासा दिला. दरम्यान, पुढील दोन दिवस शहरासह जिल्ह्यातील हवामान कोरडे राहणार असून किमान तापमानात फारसा बदल होणार नाही. तर थंडीचा जोर कमी-अधिक होईल, असा अंदाज पुणे वेधशाळेने वर्तविला आहे.

शहर, जिल्ह्यात नोंदवलेले किमान तापमान
हवेली ९, पाषाण १०.६, शिवाजीनगर १०.९, हडपसर १३.१, कोरेगाव पार्क १५.३, चिंचवड १३.३, वडगावशेरी १६.६, मगरपट्टा १६.८, दौंड ११.२, बारामती ११.४, आंबेगाव १२.२, माळीण १०.३, तळेगाव १३.७, कुरवंडे १६.२ अंश सेल्सिअस