अण्णा भाऊ साठे चित्रपट महोत्सव शुक्रवारपासून

पुणे, ता. १९ : अण्णा भाऊ साठे आंतरराष्ट्रीय चित्रपट महोत्सव समिती आणि निर्मिती मीडिया सोल्युशन्सच्या वतीने आयोजित आठवा अण्णा भाऊ साठे आंतरराष्ट्रीय चित्रपट महोत्सव यंदा शुक्रवार (ता. २६) ते रविवार (ता. २८) या कालावधीत विधी महाविद्यालय रस्त्यावरील राष्ट्रीय चित्रपट संग्रहालयात आयोजित करण्यात आला आहे. राज्य सरकारचा सांस्कृतिक कार्य विभाग तसेच महाराष्ट्र चित्रपट, रंगभूमी व सांस्कृतिक विकास महामंडळाचे महोत्सवाला सहकार्य आहे.
महोत्सवाचे दिग्दर्शक संदीप ससाणे, प्रतिमा परदेशी, सहसंयोजिका नेहा भुकण, नीलेश रसाळ यांनी शुक्रवारी पत्रकार परिषदेत ही माहिती दिली. महोत्सवाचे उद्‍घाटन ज्येष्ठ लेखक व संपादक महावीर जोंधळे आणि ज्येष्ठ अभिनेते डॉ. मोहन आगाशे यांच्या हस्ते होणार आहे. राही अनिल बर्वे दिग्दर्शित ‘मयसभा’ या चित्रपटाने महोत्सवाची सुरुवात होईल.
या तीन दिवसीय महोत्सवात देश-विदेशातील ७० निवडक चित्रपट, लघुपट आणि माहितीपटांचे प्रदर्शन सकाळी ९ ते सायंकाळी ९ वाजेपर्यंत होणार आहे. यासह विशेष चर्चासत्रे, दिग्दर्शकांशी संवाद सत्रे आणि परिसंवादांचे आयोजन केले आहे. महोत्सवाला विनामूल्य प्रवेश आहे; मात्र नोंदणी आवश्यक आहे.
महोत्सवांतर्गत देण्यात येणारा ‘निळूभाऊ फुले कलाकार कार्यकर्ता पुरस्कार’ यंदा अभिनेते व सामाजिक भान जपणारे कलाकार मकरंद अनासपुरे यांना जाहीर झाला आहे. ज्येष्ठ नाटककार सतीश आळेकर यांच्या हस्ते अनासपुरे यांना रविवारी (ता. २८) सायंकाळी ६ वाजता पुरस्कार प्रदान केला जाणार आहे.