पुण्यात पुन्हा वाढली थंडी; किमान तापमान ७ अंशावर

पुणे, ता. १९ ः सलग दुसऱ्या दिवशी शहरासह जिल्ह्यातील किमान तापमानात दोन ते तीन अंशांने घट झाल्याने शहरात थंडी वाढली आहे. पाषाण येथे थंडीचा पारा सात अंशांपर्यंत खाली आला आहे. जिल्ह्यातील बारामती, माळीण तर शहरातील पाषाण आणि शिवाजीनगर परिसरात पुन्हा थंडी वाढली असून, पुढील दोन दिवस शहरासह जिल्ह्यातील थंडीचा कडाका कायम राहील व हवामान कोरडे राहील, अशी शक्‍यता हवामानशास्‍त्र विभागाने व्‍यक्‍त केली आहे.
गेल्‍या आठवड्यात शहर, उपनगरातील किमान तापमान १० ते ११ अंशांच्या पुढे गेल्यामुळे थंडीचा जोर काहीसा ओसरला होता; परंतु गेल्या ४८ तासांत किमान तापमानात एक ते दीड अंशाने घट झाली. गुरुवारी किमान तापमान ८ ते १० अंशांच्‍या दरम्‍यान होते. शुक्रवारी ते झपाट्याने दोन ते तीन अंशांने घटले आणि थंडीचा कडाका वाढला. शुक्रवारी रात्रीपासून हुडहुडी भरणाऱ्या थंडीने पुणेकर गारठले असून, शहरातील पाषाण येथे ७.७, तर शिवाजीनगर येथे ८.३ अंश सेल्सिअस किमान तापमानाची नोंद झाली.

बारामती, माळीणमध्‍ये किमान तापमान घटले
शहरासह जिल्ह्यातील किमान तापमानात घट झाली आहे. शुक्रवारी बारामती ७.४, माळीण ७.७ व दौंड येथे ८ अंश सेल्सिअस किमान तापमानाची नोंद झाली. दरम्यान, पुढील दोन दिवस शहरासह जिल्ह्यातील हवामान कोरडे राहील. किमान तापमानात फारसा बदल होणार नसून, थंडीचा कडाका कायम राहील, असा अंदाज पुणे वेधशाळेने वर्तविला आहे.

असे नोंदविले किमान तापमान
माळीण -पाषाण ७.७, दौंड ८, शिवाजीनगर ८.३, तळेगाव दाभाडे ९.१, आंबेगाव ९.४, निमगिरी १०.७, हडपसर १०.७, कोरेगाव पार्क १३, चिंचवड १३.९, मगरपट्टा १४.४, वडगाव शेरी १४.९, बारामती ७.४