आबा बागूल यांचा शिवसेनेत प्रवेश

पुणे, ता. २० ः पुणे महापालिकेत सलग सहा वेळा निवडून आलेले माजी नगरसेवक आबा बागूल यांनी आज उपमुख्यमंत्री एकनाथ शिंदे यांच्या उपस्थितीत ठाणे येथे शिवसेनेत प्रवेश केला. त्यामुळे काँग्रेसमधून बाहेर पडल्यानंतर बागूल कुठे जाणार या चर्चेला पूर्णविराम मिळाला आहे.
आबा बागूल हे भाजपमध्ये जाणार अशी चर्चा गेल्या दोन- अडीच वर्षापासून सुरु होती. २०२४ च्या विधानसभा निवडणुकीत बागूल यांनी काँग्रेसमधून बंडखोरी केल्याने त्यांना पक्षातून काढून टाकण्यात आले होते. त्यानंतर बागूल व त्यांचा मुलगा हेमंत बागूल हे दोघे भाजपमध्ये जातील अशी चर्चा होती. आज मुंबईत भाजपने विरोधी पक्षातील माजी नगरसेवकांचा प्रवेश करून घेतला असताना त्याचवेळी बागूल यांनी ठाण्यात शिंदे यांच्या उपस्थितीत शिवसेनेत प्रवेश केला. यामुळे प्रभाग क्रमांक ३६ सहकारनगर-पद्मावती या प्रभागातील राजकीय समीकरणे बदलणार आहेत.