बाणेरमधील लॉजमध्ये वेश्याव्यवसाय; व्यवस्थापकासह चौघांविरुद्ध गुन्हा

पुणे, ता. २३ : बाणेर परिसरातील एका लॉजमध्ये पोलिसांनी छापा टाकून लॉजमधून तरुणींची सुटका केली. याप्रकरणी लॉज व्यवस्थापकासह चौघांविरुद्ध अनैतिक मानवी वाहतूक प्रतिबंधक कायद्यान्वये (पिटा) गुन्हा दाखल केला आहे. लॉज व्यवस्थापकाला अटक करण्यात आली आहे.
प्रकाश ज्ञानेश्वर गायकवाड (वय २४, सध्या रा. फलक इन लॉज, लक्ष्मणनगर, बाणेर) असे अटक केलेल्या व्यवस्थापकाचे नाव आहे. याप्रकरणी बाळू सुभाष चौधरी, अजितपाल जितेंद्रसिंग गाढोके आणि दलाल रोशन यांच्याविरुद्धही गुन्हा दाखल करण्यात आला आहे. या संदर्भात पोलिस अंमलदार रोहित पाथरूट यांनी बाणेर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, बाणेरमधील लक्ष्मणनगर परिसरातील एका लॉजमध्ये वेश्याव्यवसाय सुरू असल्याची माहिती पोलिसांना मिळाली. आरोपींनी तरुणींना पैशांचे आमिष दाखवून देहविक्री करण्यास प्रवृत्त केल्याचे तपासात निष्पन्न झाले. या माहितीची खातरजमा करण्यासाठी पोलिसांनी बनावट ग्राहक पाठवून पडताळणी केली. त्यानंतर २१ डिसेंबर रोजी रात्री छापा टाकून लॉजमधून तरुणींची सुटका करण्यात आली. वरिष्ठ पोलिस निरीक्षक चंद्रशेखर सावंत यांच्या सूचनेनुसार पोलिस निरीक्षक (गुन्हे) अलका सरग यांच्या पथकाने ही कारवाई केली. पुढील तपास बाणेर पोलिस करीत आहेत.