परताव्याचे आमिष दाखवून अडीच लाखांची फसवणूक

पुणे, ता. २३ : बंद पडलेल्या आयुर्विमा पॉलिसीचे पैसे मिळवून देण्याचे आमिष दाखवत सायबर चोरट्यांनी वानवडीतील एका व्यक्तीची दोन लाख ५७ हजार रुपयांची ऑनलाइन फसवणूक केल्याचा प्रकार समोर आला आहे. याप्रकरणी वानवडी पोलिसांनी सायबर चोरट्यांविरुद्ध गुन्हा दाखल केला आहे.
याबाबत संबंधित नागरिकाने वानवडी पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार वानवडी भागात ज्योती विहार सोसायटीमध्ये वास्तव्यास असून २० ऑक्टोबर रोजी त्यांच्या मोबाईल क्रमांकावर चोरट्यांनी संपर्क साधला. ‘तुमची आयुर्विमा पॉलिसी बंद पडली असून, परताव्यापोटी १२ लाख रुपये मिळणार आहेत. ही रक्कम मिळवण्यासाठी काही प्रक्रिया पूर्ण करावी लागेल, त्यासाठी काही शुल्क भरावे लागेल,’ असा बहाणा करत चोरट्यांनी त्यांचा विश्वास संपादन केला. त्यानंतर विविध कारणे सांगत चोरट्यांनी तक्रारदाराकडून ऑनलाइन पद्धतीने दोन लाख ५७ हजार रुपये उकळले. फसवणूक झाल्याचे लक्षात आल्यानंतर तक्रारदाराने २२ डिसेंबर रोजी पोलिसांत तक्रार दिली. या प्रकरणाचा तपास पोलिस निरीक्षक (गुन्हे) संगीता जाधव करीत आहेत. पोलिसांनी नागरिकांना अशा प्रकारच्या फोन कॉल्स, संदेश व ई-मेल्सपासून सावध राहण्याचे आवाहन केले आहे.