‘राष्ट्र प्रथम’ मंत्राने चालणारी ‘बीएमएस’ ही सामाजिक क्रांती’

पुणे, ता. २३ : ‘‘भारतीय मजदूर संघ (बीएमएस) ही केवळ कामगार संघटना नसून ती ‘राष्ट्र प्रथम’ या मंत्राने चालणारी एक सामाजिक क्रांती आहे. दत्तोपंत ठेंगडी यांनी पेरलेल्या राष्ट्रनिष्ठ विचारांमुळेच आज ही संघटना अडीच कोटी सभासदांसह जगातील पहिल्या क्रमांकाची संघटना बनली आहे,’’ असे प्रतिपादन ‘बीएमएस’चे माजी अखिल भारतीय संघटन महासचिव अशोक जोशी यांनी केले.

‘नॅशनल ऑर्गनायझेशन ऑफ इन्शुरन्स पेन्शनर्स’च्या पुणे विभागाची वार्षिक सर्वसाधारण सभा नुकतीच पार पडली. त्या वेळी ते बोलत होते. या वेळी विभागीय अध्यक्ष हरिभाऊ कुलकर्णी, कार्याध्यक्ष राजेश मोवाडे, सचिव अजय लाड, देविदास पाटील आणि राम धुमणे आदी उपस्थिती होते. या प्रसंगी मोवाडे यांनी संघटनेच्या भावी विस्ताराचा संकल्प मांडला. पुणे विभागाने १० हजार सभासदांचा टप्पा यशस्वीपणे पार केला असून, आता पुढील दोन वर्षांत ही संख्या २० हजार करण्यावर भर असेल, असे त्यांनी नमूद केले.