‘आप’तर्फे १६ उमेदवारांची दुसरी यादी जाहीर

पुणे, ता. २३ : आम आदमी पक्षाने (आप) पुणे महापालिका निवडणुकीसाठी पक्षाच्या १६ उमेदवारांची दुसरी यादी राज्याचे प्रभारी आणि दिल्लीचे माजी आमदार प्रकाश जरवाल यांनी मंगळवारी जाहीर केली. आत्तापर्यंत ‘आप’ने एकूण ४१ उमेदवार घोषित केले असून ही निवडणूक स्वबळावर लढण्याचे जाहीर केले आहे.
पक्षातर्फे यावेळी आलिशा मुलानी (प्रभाग क्र. १ अ), स्मिता सोंडे (२ अ), माधुरी वडमारे (३ क), सचिन खंकाळ,(४ अ), अनिकेत गागडे (१५ ड ), स्वप्नील गोरे (१६ ड ), अरुण शिंदे (१७ ड ), इरफान रोड्डे (२२ ब ), शेखर ढगे (२२ ड), इक्बाल तांबोळी (२३ ड), तसेच पियुष हिंगणे (२६ ड), सूरज सोनवणे (२७ अ ), प्रदीप उदागे (२९ ड), प्रतीक खोपडे (३६ ड), मालन नाडे (३९ अ), निखिल खंदारे (४० अ) या उमेदवारांची घोषणा जरवाल यांनी पत्रकार परिषदेत केली. यावेळी ‘आप’चे राज्य प्रवक्ते मुकुंद किर्दत, शहर अध्यक्ष धनंजय बेनकर, सुदर्शन जगदाळे आदी उपस्थित होते.
जरवाल म्हणाले, ‘‘महाराष्ट्रात आज कोण नेता कोणासोबत आहे, हे कळणे कठीण आहे. राज्यात भ्रष्टाचाराची परिसीमा गाठली गेली आहे. निवडून आल्यावर आत्ताचे नगरसेवक कोट्यधीश बनले आहेत. विकास हा सामान्य माणसापर्यंत पोचवण्यासाठी शाळा, दवाखाने, वाहतूक, रोजगार, यावर भर देणारे धोरण आणि विकासाचे मॉडेल ‘आप’चे असेल.’’

प्रचारासाठी केजरीवाल महाराष्ट्रात येणार
‘आप’चे राष्ट्रीय अध्यक्ष अरविंद केजरीवाल, खासदार संजय सिंग, माजी मुख्यमंत्री अतिशी, पंजाब मुख्यमंत्री भगवंत मान, राखी बिडलान हे महापालिकेच्या निवडणुकीच्या प्रचारासाठी राज्यात येणार असल्याचेही जरवाल यांनी सांगितले.