पुण्यात तीन वर्षांतील सर्वांत नीचांकी तापमान

पुणे, ता. १८ : आर्द्रतेचे कमी झालेले प्रमाण, निरभ्र आकाश आणि उत्तरेकडून सातत्याने येणाऱ्या थंड वाऱ्यांचा वाढलेला प्रभाव यामुळे पुणे शहरातील किमान तापमानात लक्षणीय घट झाली आहे. परिणामी शहरात अनेक ठिकाणी किमान तापमान १० अंश सेल्सिअसपेक्षा कमी नोंदविले गेले आहे. लोणी काळभोर (हवेली) येथे ६.९ अंश सेल्सिअस अशा नीचांकी तापमानाची नोंद झाली, तर पुण्यात शिवाजीनगर येथे ९.४ अंश सेल्सिअस तापमानाची नोंद झाली असून, गेल्या तीन वर्षांतील सर्वांत नीचांकी तापमान मंगळवारी नोंदविले गेले. पुण्यात गेल्या दोन दिवसांपासून कमी होणाऱ्या किमान तापमानामुळे पुणेकरांना चांगलीच हुडहुडी भरली आहे.
संपूर्ण राज्यात हवामान कोरडे असून मराठवाड्यात बऱ्याच ठिकाणी किमान तापमानात सरासरीच्या तुलनेत लक्षणीय घट, तर कोकण-गोवा आणि मध्य महाराष्ट्रात तुरळक ठिकाणी किमान तापमानात सरासरीच्या तुलनेत किंचित घट झाली आहे. मध्य महाराष्ट्रात बुधवारी (ता. १९) तुरळक ठिकाणी थंडीचा लाट येण्याची शक्यता भारतीय हवामानशास्त्र विभागाने वर्तविली आहे. पुणे आणि परिसरातही थंडीचा कडाका जाणवत आहे. शिवाजीनगर येथे ९.४ आणि पाषाण नऊ अंश सेल्सिअस तापमानाची नोंद झाली.
राज्यात जळगावमध्ये ७.१ अंश सेल्सिअस अशा सर्वाधिक नीचांकी तापमानाची नोंद झाली आहे. तर थंड हवेचे ठिकाण अशी ओळख असणाऱ्या महाबळेश्वरमध्ये १० अंश सेल्सिअस तापमान नोंदविले असून पुण्यात त्यापेक्षा कमी तापमान नोंदविले गेले. मध्य महाराष्ट्रात पुण्यासह अहिल्यानगर (८.४), जळगाव (७.१), मालेगाव (९.६), नाशिक (९.२) आणि विदर्भात गोंदिया (९.६), यवतमाळ (९.६) अशा १० अंश सेल्सिअसपेक्षा कमी किमान तापमानाची नोंद झाली.

मंगळवारी नोंदविलेले किमान तापमान (अंश सेल्सिअसमध्ये)
शिवाजीनगर (९.४), पाषाण (९.०), हवेली (६.९), बारामती (८.९), माळीण (९.२), तळेगाव (९.९), दौंड (९.९), आंबेगाव (१०.७)

नोव्हेंबरमधील दहा वर्षांतील सर्वांत नीचांकी तापमान
वर्ष : नोंदविले गेलेले नीचांकी तापमान (तारीख)
२०१४ : ११.२ (३० नोव्हेंबर)
२०१५ : १२.९ (१८, १९, २० नोव्हेंबर)
२०१६ : ९.३ (२७ नोव्हेंबर)
२०१७ : ११.४ (१३ नोव्हेंबर)
२०१८ : ११.४ (२८ नोव्हेंबर)
२०१९ : १४.१ (२६ नोव्हेंबर)
२०२० : ९.८ (१२ नोव्हेंबर)
२०२१ : १०.९ (११ नोव्हेंबर)
२०२२ : ८.८ (२१ नोव्हेंबर)
२०२३ : १४.४ (१६, १७ नोव्हेंबर)
२०२४ : ९.५ (२९ नोव्हेंबर)

थंडी वाढण्याची कारणे
१. निरभ्र आकाश आणि कोरडे हवामान
२. आर्द्रतेचे कमी झालेले प्रमाण
३. उत्तरेकडून सातत्याने येणाऱ्या थंड वाऱ्यांचा वाढलेला प्रभाव