श्री साईबाबा पालखीचे रविवारी प्रस्थान

पुणे, ता. २६ ः गुरुपौर्णिमेनिमित्त श्री साईबाबा पालखीचे श्री क्षेत्र शिर्डीकडे रविवारी (ता. २९) सकाळी नऊ वाजता कसबा गणपती मंदिरापासून प्रस्थान होईल.
श्री साईबाबा पालखी सोहळा समितीतर्फे हा सोहळा होणार असून, त्याचे यंदाचे ३७ वे वर्ष आहे. या पालखी सोहळ्यावर सकाळी दहा वाजता हेलिकॉप्टरद्वारे पुष्पवृष्टी होईल आणि अहिल्यानगर मार्गे हा सोहळा ८ जुलैला श्री क्षेत्र शिर्डीस पोहोचेल. श्री वासुदेव निवास, पुणेचे प्रधान विश्‍वस्त योगश्री शरदशास्त्री जोशी महाराज यांच्या हस्ते, तसेच ‘सकाळ माध्यम समूहा’चे व्यवस्थापकीय संचालक अभिजित प्रताप पवार यांच्या अध्यक्षतेखाली आणि डी. वाय. पाटील विद्यापीठाचे कुलपती डॉ. पी. डी. पाटील यांच्या प्रमुख उपस्थितीत पालखीचे प्रस्थान होईल. याप्रसंगी केंद्रीय हवाई वाहतूक राज्यमंत्री मुरलीधर मोहोळ, नगरविकास राज्यमंत्री माधुरी मिसाळ, आमदार हेमंत रासने, माजी आमदार रवींद्र धंगेकर, माजी नगरसेवक श्रीनाथ भिमाले, ‘जितो’ पुणेचे संस्थापक अध्यक्ष अचल जैन आदी उपस्थित असतील, अशी माहिती समितीचे सचिव मंदार शहाणे यांनी दिली.
या सोहळ्यादरम्यान व्यसनमुक्तीचे उपक्रम राबविले जातील व स्वच्छ भारत अभियानांतर्गत स्वच्छतेसाठी आधुनिक मोबाईल टॉयलेटचा वापर होईल, तसेच सोहळ्याचे उत्कृष्ट छायाचित्रीकरण करणाऱ्यास आकर्षक बक्षीस मिळणार असल्याचे शहाणे यांनी सांगितले. या पालखी सोहळ्यात राज्याच्या विविध भागांतील साईभक्त सहभागी होणार असून, पुणेकरांनी याचा जास्तीत जस्त लाभ घ्यावा, असे आवाहन समितीतर्फे करण्यात आले आहे.