लोहगावमधील तरुणाला गांजा विक्रीप्रकरणी अटक

पुणे, ता. २६ ः लोहगाव परिसरात गांजा विक्रीसाठी आलेल्या एकाला विमानतळ पोलिसांनी अटक केली आहे. त्याच्याकडून तीन लाख रुपयांचा १२ किलो गांजा जप्त करण्यात आला.
अखिलेश गरीब मंडल (वय ३४, रा. लोहगाव) असे अटक करण्यात आलेल्याचे नाव आहे. या प्रकरणी त्याच्यावर अमली पदार्थ प्रतिबंधक कायद्यांतर्गत गुन्हा दाखल करण्यात आला आहे. लोहगावमधील कर्मभूमीनगर परिसरात एक जण थांबला असून, त्याच्याकडे गांजा असल्याची माहिती पोलिस उपनिरीक्षक नितीन राठोड यांना मिळाली होती. त्यानंतर तपास पथकाने सापळा लावून त्याला ताब्यात घेतले. त्याची झडती घेण्यात आली. तेव्हा त्याच्याकडील कापडी पिशवीत सुमारे १२ किलो गांजा सापडला, जप्त करण्यात आलेल्या गांजाची किंमत तीन लाख रुपये आहे. मंडल हा बांधकाम मजूर आहे. त्याने गांजा कोठून आणला, यादृष्टीने पोलिसांकडून तपास करण्यात येत आहे. विमानतळ पोलिस ठाण्याचे उपनिरीक्षक नितीन राठोड, पोलिस कर्मचारी रूपेश पिसाळ, शैलेश नाईक, राकेश चांदेकर, अंकुश जोगदंडे, दादासाहेब बर्डे आणि पथकाने ही कारवाई केली.