‘एमआयटी’तर्फे सुवर्णपदक विजेत्या विद्यार्थ्यांचा सन्मान

पुणे, ता. २७ : ‘‘राज्यात १ लाख ८ हजार शाळा आहेत. त्यात ६५ हजार शासकीय शाळा असून तेथे विद्यार्थ्यांची संख्या वाढविण्यावर भर दिला जात आहे. आदर्श शाळा निर्माण करून उत्कृष्ट सुविधा उपलब्ध करून दिल्या आहेत. त्यामुळे परिस्थितीवर मात करण्याची विद्यार्थ्यांनी जिद्द ठेवावी,’’ असे मत शालेय शिक्षण राज्यमंत्री डॉ. पंकज भोयर यांनी व्यक्त केले.
विश्‍वशांती केंद्र (आळंदी), माईर्स एमआयटी, पुणे या संस्थेच्या वतीने शालेय विद्यार्थ्यांसाठी घेण्यात आलेल्या ‘विश्‍वधर्मी प्रा. डॉ. विश्‍वनाथ कराड अध्यात्म-विज्ञानाधिष्टीत वैश्‍विक शिक्षण शिष्यवृत्ती २०२५’मधील सुवर्णपदक विजेत्या सर्वोत्कृष्ट विद्यार्थ्यांचा सन्मान करण्यात आला. याप्रसंगी ते बोलत होते. अध्यक्षस्थानी माईर्स एमआयटी पुणेचे संस्थापक प्रा. डॉ. विश्‍वनाथ कराड हे होते. तसेच बालभारतीचे विशेष अधिकारी डॉ. अजयकुमार लोळगे, एमआयटी विश्‍वप्रयाग विद्यापीठ, सोलापूरच्या कार्यकारी संचालिका प्रा. स्वाती कराड चाटे, एमआयटी शिक्षण संस्थेच्या सहव्यवस्थापकीय विश्‍वस्त डॉ. सुचित्रा कराड-नागरे व परीक्षेचे मुख्य समन्वयक व नागपूर विद्यापीठाचे माजी कुलगुरू डॉ. एस.एन. पठाण हे उपस्थित होते. सुप्रिया होले यांनी सूत्रसंचालन केले. देवयानी पालवे यांनी आभार मानले.
या शिष्यवृत्ती परिक्षेच्या राज्यस्तरीय विजेतेपदाबरोबरच पश्‍चिम महाराष्ट्र विभागात सोहम गंभिरे प्रथम, दर्शन जगदाळे द्वितीय, आर्य लोखंडे तृतीय, पायल बोरुडे चतुर्थ आणि वेदिका बडे हिने पाचवा क्रमांक पटकाविला. तसेच मराठवाडा विभागात अथर्व वाघचौरे प्रथम, वैभवी लहाडे द्वितीय, आर्या गडदे तृतीय, सूरज गायकवाड चतुर्थ, तर दिव्या धांडे हिने पाचवा क्रमांक, तर विदर्भ विभागात गौरी मुंडोकार प्रथम, पयोष्णी पार्शिवकर द्वितीय, सह्याद्री कळसकर तृतीय, स्वराज बंड चतुर्थ आणि वैभवी अकोटकर याने पाचवा क्रमांक पटकविला आहे.