हिंदी भाषा सक्तीविरोधात शुक्रवारी आंदोलन

पुणे, ता. २८ : ‘नवीन राष्ट्रीय शिक्षण धोरण २०२०’ आणि ‘राज्य अभ्यासक्रम आराखडा शालेय शिक्षण’ याअंतर्गत पहिली ते पाचवीच्या वर्गांना लागू करण्यात आलेल्या त्रिभाषा सूत्राच्या निषेधार्थ विविध संघटना येत्या शुक्रवारी (ता. ४) आंदोलन करणार आहेत.
त्रिसूत्री धोरणानुसार पहिलीपासून विद्यार्थ्यांना हिंदी भाषा सक्तीने शिकविली जाणार आहे. त्याच्या निषेधार्थ बालभारती ते बालगंधर्व रंगमंदिर यादरम्यान मोर्चा काढून आंदोलन करण्यात येणार असल्याची माहिती विविध संघटनांच्या प्रतिनिधींनी दिली. त्यात स्टुडंट्स फेडरेशन ऑफ इंडिया (एसएफआय), डेमोक्रॅटिक युथ फेडरेशन ऑफ इंडिया (डीवायएफआय), दिशा विद्यार्थी संघटना, छात्रभारती, न्यू स्टुडंट्स अँड युथ फेडरेशन (एनएसवयएफ), एनएपीएम, युक्रांद आदी संघटनांचा समावेश आहे.
हिंदी भाषेची सक्ती तातडीने मागे घ्यावी, प्रत्येकाला केजी ते पीजी पूर्णतः विनामूल्य आणि दर्जेदार शिक्षण मिळावे, प्रत्येक विद्यार्थ्याला त्याच्या आवडीच्या माध्यम भाषेत शिकण्याचा व भाषेचे शिक्षण घेण्याचा अधिकार असला पाहिजे, लोकभाषेत अभ्यासक्रमाची निर्मिती केली पाहिजे, कोणावरही कोणत्याही माध्यमाची आणि भाषेची सक्ती नको, आदी मागण्या या संघटनांनी केल्या आहेत.