हर्षित शंकर यांच्या वादनाला रसिकांची दाद

पुणे, ता. २७ : व्योमी मीडिया अँड एंटरटेनमेंटच्या प्रियांका यादव यांच्या संकल्पनेतून आयोजित केलेल्या ‘शंकर ध्वनी’ कार्यक्रमात बासरीवादक पं. हरिप्रसाद चौरसिया यांच्या शिष्य हर्षित शंकर यांच्या वादनाने रसिक मंत्रमुग्ध झाले.
यावेळी खासदार डॉ. मेधा कुलकर्णी, ज्येष्ठ तबलावादक पं. अरविंदकुमार आझाद, सारंगधर साठे, अनिल कुमार आदी यावेळी उपस्थित होते. वैष्णवी डेरे यांच्या भरतनाट्यम प्रस्तुतीने मैफलीची सुरुवात झाली. ‘प्रणवा कारम्’, ‘सिद्धिविनायकम्’ तसेच ‘अधीर बिराजे’, ‘बासरी श्याम’ या रचनांचे नृत्य सादरीकरण करत त्यांनी रसिकांची मने जिंकली. हर्षित शंकर यांनी पारंपारिक शास्त्रीय वादनातून प्रारंभ केला. रात्रीच्या प्रहरातील राग जोग सादर करत आलापामधून स्वरांचे सौंदर्य उलगडले. त्यांच्या वादनातून श्रोत्यांना गौरवशाली परंपरेचे दर्शन घडले. आशिष रागवाणी (तबला), शुभम उगले (पखवाज), रोहित कुलकर्णी (कीबोर्ड), अपूर्व द्रविड (तालवादक) यांनी त्यांना साथ दिली. अनघा हरकरे यांनी सूत्रसंचालन केले.