सणस मैदानावर परवानगी नाही

सणस मैदानामध्ये ढोल-ताशा पथकांना वादनाचा सराव करण्यास परवानगी दिलेली नाही. तसे आढळल्यास कारवाई केली जाईल, असे महापालिका आयुक्त नवल किशोर राम यांनी गुरुवारी सांगितले.
ढोल-ताशा पथकांना सरावासाठी महापालिकेचे मैदान उपलब्ध करून देण्याची मागणी काही मंडळांनी महापालिकेकडे केली होती. तसेच काही मंडळांकडून सारसबागेजवळील सणस मैदानाजवळ ढोल ताशा वादनासाठी थेट शेड ठोकण्याचे साहित्य गुरुवारी मैदानात आणण्यात आल्याचा प्रकार उघडकीस आला. याबाबतची माहिती आयुक्त नवल किशोर राम व अतिरिक्त आयुक्त ओमप्रकाश दिवटे यांना मिळाली. त्याबाबत आयुक्त राम म्हणाले, ‘‘ढोल-ताशा वादन पारंपरिक वादनाचा प्रकार आहे. त्यामुळे संबंधित पथकांनी कोणालाही त्रास होणार नाही, अशा ठिकाणी वादनाचा सराव केल्यास हरकत नाही. सणस मैदान येथे वादनाच्या सरावासाठी काही ढोल-ताशा पथकांनी मागणी केली आहे, आम्ही त्यांना परवानगी दिलेली नाही. परवानगी नसतानाही कोणी मैदानामध्ये सरावाचा प्रयत्न केल्यास त्यांच्यावर कारवाई केली जाईल.’’