आंतरशालेय कॉम्प्युस्किल्स चॅम्पियनशिप स्पर्धेचे आयोजन

पुणे, ता. २४ ः इयत्ता पाचवी ते दहावीच्या विद्यार्थ्यांमध्ये संगणक कौशल्य आणि सर्जनशीलतेला वाव देण्यासाठी ‘आंतरशालेय कॉम्प्युस्किल्स चॅम्पियनशिप २०२५’ स्पर्धेचे आयोजन करण्यात आले आहे.
आचार्य श्री विजय वल्लभ स्कूल, कॉम्प्युटर सोसायटी ऑफ इंडिया, महाराष्ट्र नॉलेज कॉर्पोरेशन लिमिटेड (एमकेसीएल), टाटा क्लास एज, रोटरी क्लब ऑफ पूना मिडटाऊन, युनियन बँक ऑफ इंडिया आणि अरिना अॅनिमेशन यांच्यातर्फे ही स्पर्धा होईल.
ही स्पर्धा ‘स्क्रॅच’ या प्रोग्रॅमिंग भाषेत होणार असून, इयत्ता पाचवी ते सातवी आणि इयत्ता आठवी ते दहावी हे स्पर्धेचे दोन गट आहेत. उत्कृष्ट अॅनिमेशन, सर्जनशीलता, सामाजिक संदेश, अद्वितीय संकल्पना हे स्पर्धेचे विभाग आहेत. स्पर्धेच्या नावनोंदणीसाठी २० ऑगस्ट २०२५ हा शेवटचा दिवस आहे, तर प्रकल्प ई-मेलद्वारे सादर करण्याची ४ ऑक्टोबर २०२५ ही अंतिम तारीख आहे, तसेच स्पर्धेची उपांत्य फेरी ही १५ नोव्हेंबरला होणार आहे, अशी माहिती संस्थेचे अध्यक्ष सुभाष परमार, मुख्याध्यापिका विमल यादव, रोटरीच्या मीनल अवचट, कॉम्प्युटर सोसायटी ऑफ इंडियाचे राहुल पितळे यांनी गुरुवारी पत्रकार परिषदेत दिली. स्क्रॅच हे सॉफ्टवेअर www.scratch.mit.edu या संकेतस्थळावर मोफत उपलब्ध आहे. अधिक माहितीसाठी शाळेत संपर्क साधण्याचे आवाहन करण्यात आले आहे.