‘मिडका’च्या अध्यक्षपदी आनंद भानुशाली यांची निवड

पुणे, ता. २८ : महाराष्ट्र इमरसिव्ह कंटेंट क्रिएटर्स असोसिएशनच्या (मिडका) अध्यक्षपदी फिल्म सीजीआय स्टुडिओचे संचालक आनंद भानुशाली, सचिवपदी सृजन कॉलेज ऑफ डिझाईनचे संचालक संतोष रासकर, उपाध्यक्षपदी ८८ स्टुडिओजचे संचालक मिलिंद पवार तर अॅनिमेशन एक्सप्रेसचे संचालक मिशाल वनवारी यांची खजिनदार म्हणून निवड करण्यात झाली आहे.
‘मिडका’ ही अॅनिमेशन, व्हिज्युअल इफेक्ट, गेमिंग, कॉमिक, एक्सआर या क्षेत्रात काम करणाऱ्या उद्योजकांची संघटना असून नुकत्याच मुंबईमध्ये झालेल्या बैठकीत संस्थेच्या पदाधिकाऱ्यांची निवड एकमताने करण्यात आली. या बैठकीमध्ये विविध विषय समितीवरील पदाधिकारी म्हणून योगेश घाग, राहुल बक्षी, अजय पारगे, गौरव मल्होत्रा, राजीव कुमार रस्तोगी, मेहूल हिरानी, सुजय पाटील, अस्मिता भंडारी, अबीर ऐन्च, नेहा मेहता, मिशाल वनवारी, विक्रांत जाधव, राहुल बोजळवार, अभ्युदय ग्रोव्हर, राजीव द्विवेदी, समित शेट्टी, आनंद झा, चैतन्य चिंचलीकर, आलोक वर्मा यांची निवड एकमताने करण्यात आली. आशिष कुलकर्णी यांची मिडकाच्या निमंत्रित सल्लागारपदी निवड करण्यात आली.
भानुशाली म्हणाले, ‘‘भारतीय अॅनिमेशन, व्हिज्युअल इफेक्ट, गेमिंग, कॉमिक आणि एक्स आर उद्योगाच्या वाढीसाठी देशपातळीवर विविध प्रयत्न सुरू आहेत. या उद्योगांत मागील काही वर्षात मोठ्या प्रमाणात वाढ झाली आहे. या पार्श्वभूमीवर राज्य सरकार देखील लवकरच स्वतंत्र एव्हिजिसी-एक्सआर पॉलिसीबाबत निर्णय घेत आहे. भारताला जगाचे आणि महाराष्ट्राला भारताचे केंद्र बनविण्यासाठी सर्व स्तरातून प्रयत्न होत आहेत. त्यासाठी ‘मिडका’सारख्या उद्योजकांच्या संघटित स्वरूपाची आवश्यकता आहे.’’
रासकर म्हणाले, ‘‘या क्षेत्रात काम करणाऱ्या उद्योजकांसाठी केंद्र आणि राज्य सरकार विविध योजना आणि उपक्रम करत आहेत. त्याचा लाभ सर्व उद्योजकांपर्यंत पोहोचविण्यासाठी काम करायचे आहे.’’