पोलिसांवरील आरोप निराधार ः अमितेश कुमार

पुणे, ता. २९ : माजी मंत्री एकनाथ खडसे यांनी खराडी येथील कथित रेव्ह पार्टी प्रकरणात पुणे पोलिसांवर केलेले सर्व आरोप निराधार असल्याचे सांगत पोलिस आयुक्त अमितेश कुमार यांनी त्या आरोपांचे खंडन केले. पोलिसांनी अत्यंत पारदर्शकपणे आणि नियमानुसार कायदेशीर कारवाई केली असल्याचा पुनरुच्चारही त्यांनी केला.
गणेश मंडळांच्या बैठकीनंतर ते माध्यमांशी बोलत होते. अमितेश कुमार म्हणाले, ‘‘जे काही आरोप होत आहेत, ते सगळे निराधार आहेत. पोलिसांची कारवाई पारदर्शक, नियमानुसार आणि कायदेशीर आहे. या कारवाईची विस्तृत माहिती प्रसार माध्यमांना आधीच देण्यात आली आहे. पुणे पोलिसांच्या भूमिकेवर संशय घेण्याचे काही कारण नाही.’’ माध्यमांना किंवा इतर व्यक्तींना पोलिसांनी फोटो आणि व्हिडिओ दिले, असा आरोप केला जात आहे. याबाबत ते म्हणाले, ‘‘कुठल्याही प्रकारचे फोटो किंवा व्हिडिओ पोलिसांकडून देण्यात आले नाहीत. लोक फोटो किंवा व्हिडिओ काढत असतील तर त्यावर आम्ही बंधन घालू शकत नाही.’’
‘‘पोलिसांनी गोपनीय माहितीच्या आधारे कारवाई केली. या कारवाईबाबत कुणीही मनात शंका घेऊ नये. आम्ही कुठल्याही प्रकारचा फोटो लीक केला नाही. कोणतेही व्हिडिओ पोलिसांकडून लीक करण्यात आले नाहीत,’’ असे त्यांनी स्पष्ट केले.