खडकीतील भर चौकात दोन पोलिसांना मारहाण चौघांना पोलिस कोठडीत ठेवण्याचे आदेश

पुणे, ता. २ ः दुचाकी वेडीवाकडी चालविल्याप्रकरणी विचारणा करणाऱ्या पोलिसांना टोळक्याने भर चौकात मारहाण केली. मुंबई-पुणे रस्त्यावरील चर्च चौकात गुरुवारी (ता. ३१) रात्री ही घटना घडली. या प्रकरणी खडकी पोलिसांनी चौघांना अटक केली आहे.
जुनैद इक्बाल शेख (वय २७, रा. आदित्यनगर, भोसरी), नफीज नौशाद शेख (वय २५, रा. आदित्यनगर, भोसरी), युनूस युसूफ शेख (वय २५, रा. गौरीनगर, भोसरी, मूळ रा. भुसावळ), आरिफ अक्रम शेख (वय २५, रा. संत तुकारामनगर, भोसरी) यांना अटक करण्यात आली आहे. याबाबत खंडणी विरोधी पथकातील पोलिस कर्मचारी गोपाल गोठवाल (वय २८) यांनी खडकी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, पोलिस कर्मचारी गोठवाल आणि काजळे हे गुन्हे शाखेच्या खंडणी विरोधी पथकात नियुक्तीस आहेत. गुरुवारी (ता. ३१) रात्री साडेआठच्या सुमारास ते मुंबई-पुणे महामार्गावर गस्त घालत होते. त्यावेळी दोन आरोपी दुचाकीवरून भरधाव वेगाने निघाले होते. गोठवल आणि काजळे यांनी आरोपींना दुचाकी वेडीवाकडी का चालवितो? अशी विचारणा केली. त्यानंतर आरोपींनी पोलिस कर्मचाऱ्यांना शिवीगाळ केली. त्यानंतर पोलिस कर्मचाऱ्यांनी दोघांना दुचाकी बाजूला घेण्यास सांगितले. त्यानंतर दुचाकीवरील दोघा आरोपींनी पोलिस कर्मचारी गोठवाल आणि काजळे यांना मारहाण करण्यास सुरुवात केली.
त्यानंतर आरोपींचे दोन साथीदार दुसऱ्या दुचाकीवरून तेथे आले. त्यांनीदेखील गोठवाल आणि काजळे यांना मारहाण करण्यास सुरुवात केली. काजळे यांनी त्वरित पोलिस नियंत्रण कक्षाला याबाबतची माहिती कळविली. गस्त घालणारे पोलिसांचे पथक तेथे पोचले व त्यांनी आरोपींना ताब्यात घेतले. मारहाणीत पोलिस कर्मचारी गोठवाल यांचे डोके, छातीला दुखापत झाली आहे. पोलिस उपनिरीक्षक दिग्विजय चौगुले या गुन्ह्याचा तपास करत आहेत. चार आरोपींना पोलिस कोठडीत ठेवण्याचे आदेश न्यायालयाने दिले.