शिकवणी वर्गातच विद्यार्थ्याचा निर्घृण खून

राजगुरुनगर, ता. १५ : दोन-तीन महिन्यांपूर्वी झालेल्या भांडणातून दहावीच्या विद्यार्थ्याने खासगी शिकवणी वर्गातील सहाध्यायी विद्यार्थ्याचा शिकवणी सुरू असतानाच धारदार शस्त्राने मानेवर आणि पोटावर वार करून निर्घृण खून केल्याची घटना राजगुरुनगर (ता. खेड) येथे सोमवारी (ता. १५) सकाळी नऊ वाजण्याच्या सुमारास घडली. पुष्कर दिलीप शिंगाडे (वय १६, रा. वाडा रोड, राजगुरुनगर) असे खून झालेल्या विद्यार्थ्याचे नाव आहे.
पोलिस अधिकाऱ्यांनी दिलेल्या माहितीनुसार, राजगुरुनगर येथील पाण्याच्या टाकीजवळील एका बोळातील इमारतीत पाचवी ते दहावीच्या विद्यार्थ्यांसाठी खासगी शिकवणी वर्ग आहे. या वर्गातील दहावीच्या दोन मुलांमध्ये दोन-तीन महिन्यांपूर्वी भांडण झाले होते, तसेच कबड्डी खेळताना त्याच्या हातास दुखापत झाली होती. तेव्हापासून संशयित अल्पवयीन विद्यार्थी शिकवणी वर्गात फारसा येत नव्हता. शनिवारी (ता. १३) तो शिकवणीला आला होता. तेव्हा त्याच्यात आणि पुष्कर यांच्यामध्ये वाद झाला होता. सोमवारी तो सकाळी साडेसात वाजता तळमजल्यावरच असलेल्या वर्गात आला. सकाळी नऊ वाजण्याच्या सुमारास तासिका संपून सगळे निघाले असतानाच जुन्या भांडणाचा राग मनात धरून अल्पवयीन आरोपीने पुष्करच्या पोटावर आणि मानेवर धारदार शस्त्राने वार केले. अचानक घडलेल्या या प्रसंगाने वर्गातील मुली किंचाळल्या. शिक्षिकाही घाबरली. त्यांनी गंभीर जखमी विद्यार्थ्याला कसेबसे बाहेर रस्त्यावर आणले. तेथून आसपासच्या लोकांच्या मदतीने त्याला चांडोली ग्रामीण रुग्णालयात नेले. मात्र, डॉक्टरांनी त्याला मृत घोषित केले. तोपर्यंत घटनास्थळी पोलिस पोहोचले. संशयित अल्पवयीन आरोपी तिथेच शांतपणे पोलिसांच्या स्वाधीन झाला. ही बातमी वाऱ्यासारखी शहरात पसरली. अनेकांनी घटनास्थळी गर्दी केली. पोलिसांनी पंचनामा केला. न्यायवैद्यक शाखेच्या पथकानेही तपासणी केली. खेड उपविभागीय पोलिस अधिकारी अमोल मांडवे आणि खेड पोलिस ठाण्याचे पोलिस निरीक्षक सुभाष चव्हाण यांनी घटनास्थळी येऊन तपास केला. मृत विद्यार्थ्याचे वडील एसटीमध्ये वाहक म्हणून काम करतात. कोवळ्या वयातील मुलगा गेल्याने शिंगाडे कुटुंबावर दुःखाचा डोंगर कोसळला आहे.