शिर्सुफळ मॅरेथॉनला उत्स्फूर्त प्रतिसाद

शिर्सुफळ, ता. २३ : शिर्सुफळ (ता. बारामती) ग्रामपंचायतच्या वतीने लोकसहभागातून शनिवारी (ता. २०) ‘शिर्सुफळ शक्ती मॅरेथॉन’ स्पर्धा झाल्या. या स्पर्धेत शिर्सुफळसह आसपासच्या परिसरातील लहानांपासून ज्येष्ठांनी मोठ्या संख्येने सहभाग घेतला होता.
स्पर्धेतील विजेत्यांना रोख रक्कम, सन्मानचिन्ह व पदके, देशी झाड देऊन सन्मानित करण्यात आले. यावेळी मुख्यमंत्री समृद्ध पंचायत राज अभियान उपक्रमाच्या माध्यमातून ग्रामपंचायतीचा १०० टक्के कर भरणाऱ्या ग्रामस्थांचा माझा गाव माझा अभिमान पुरस्कार देऊन सन्मान करण्यात आला. तसेच ‘स्वच्छ माझे अंगण’ या उपक्रमात सहभागी झालेल्या महिलांना स्वच्छतेच्या साहित्याचे वाटप करण्यात आले. यावेळी बारामती पंचायत समितीचे गटविकास अधिकारी किशोर माने, सरपंच जुई हिवरकर, ग्रामविकास अधिकारी प्रदीप बनसुडे आदी उपस्थित होते.