नावीन्यपूर्ण अन् कल्पक वस्त्रांचे पर्याय

स्वारगेट, ता. ८ ः लाडक्या बाप्पाला सजविण्यासाठी नावीन्यपूर्ण आणि कल्पक वस्त्रांचे पर्याय उपलब्ध झाले आहेत. पितांबर, शेले, उपरणे, पगडी, फेटा आदींनी दुकाने सजली आहेत.
दरवर्षी विविध प्रकार बाजारात येत असतात. मागणीनुसार कारागीरही नवनवीन डिझाइनची वस्त्रे तयार करतात. यंदाही यामध्ये वाढ झाली असून असंख्य पर्याय उपलब्ध झाले आहेत. अगदी ५० रुपयांपासून ते साडेतीन हजार रुपये किमतीपर्यंत ही वस्त्रे उपलब्ध आहेत. विशेष म्हणजे प्रत्येक वस्त्राचे पाच ते दहा प्रकार पाहायला मिळतात.
पितांबरमध्ये काठाचे, पैठणीचे तसेच काठाचे धोतर असे वेगळे पर्याय आहेत. पगडीमध्ये शिंदेशाही, पेशवाई, मल्हारी आदी प्रकारांना मागणी आहे. कुर्ता, लेहेंगा, धोतर या पारंपरिक वस्त्रांसह पैठणीचा फेटा, क्रिस्टल उपरणे, कलाकुसर केलेले शेले अशा ‘हटके’ गोष्टींनाही चोखंदळ ग्राहक पसंती देत आहेत. काही कारागिरांना खास ऑर्डर देऊन हव्या असलेल्या पद्धतीची वस्त्रे तयार करून घेतली जात आहेत.

स्वतःसाठी खरेदी
बाप्पाच्या प्रतिष्ठापनेवेळी पूजेसाठी पारंपरिक वस्त्रे परिधान केली जातात. त्यांची खरेदीही केली जात आहे. धोतर, उपरणे, टोपी किंवा पगडी, पंचा आदी वस्त्रे भाविक स्वतःसाठी घेत आहेत. यामध्येही अनेक प्रकार उपलब्ध असून रेडिमेड व बांधणीचे धोतर, पैठणीचे उपरणे, पैठणी टोपी, काठाचा पंचा यांना प्राधान्य मिळत आहे. लहान मुलांसाठी देखील धोतर, कुर्ता, टोपी असा संपूर्ण पोशाख खरेदी केला जात आहे, अशी माहिती व्यावसायिक मौसमी घैसास यांनी दिली.

यंदा सुमारे १० टक्क्यांनी साहित्याच्या किमती वाढल्या आहेत. मात्र, विक्रीवर त्याचा परिणाम झालेला नाही. गणपतीच्या मूर्तीसाठी फेटे, पगडी, विविधरंगी शेले यांना सर्वाधिक पसंती देत आहेत.
- अतुल लाहोटी, व्यावसायिक

पारंपरिक वस्त्रांमुळे मूर्ती आकर्षक दिसते. त्यामुळे वेगवेगळी वस्त्रे आम्ही घेत असतो. मूर्तीनुसार वस्त्रांची निवड केली जाते. पितांबर, फेटा याची आम्ही दरवर्षी खरेदी करतो. यावर्षी शेल्यांचे सुंदर प्रकार पाहायला मिळत आहेत.
- कपिल भुजबळ, ग्राहक