अपघात

वाघोलीत अपघातांमध्ये
दोन तरुणांचा मृत्यू

वाघोली, ता. १० : वाघोली परिसरात भरधाव अवजड वाहनांमुळे दोन तरुणांचा अपघाती मृत्यू झाला. नगर रस्ता ओलांडताना टेम्पोच्या धडकेने एका पादचाऱ्याचा मृत्यू झाला. लोणीकंद येथील विठाई पेट्रोल पंपाजवळ तीन मार्च रोजी हा अपघात झाला. विकास बाबूराव चव्हाण (वय ३६, रा. लोणीकंद) असे मृताचे नाव आहे. या प्रकरणी अशोक चव्हाण यांनी दिलेल्या फिर्यादीनुसार लोणीकंद पोलिसांनी गुन्हा दाखल केला. दुसरा अपघात कोलवडी येथे गुरुवारी (ता. ७) मध्यरात्री झाला. अज्ञात वाहनाच्या धडकेत दुचाकीस्वार तरुणाचा मृत्यू झाला. नीरज भारत दळवे (वय २०, रा. सोलापूर) असे मृताचे नाव आहे. या प्रकरणी वैभव शिंदे यांनी दिलेल्या फिर्यादीनुसार लोणीकंद पोलिसांनी गुन्हा दाखल केला.
दरम्यान, वाघोलीसह परिसरात अपघातांचे सत्र सुरू आहे. केवळ नगर महामार्गावरच नव्हे तर अंतर्गत रस्त्यांवरही अपघात होत आहेत. यात पादचारी आणि दुचाकीस्वारांचा बळी जात आहे. २३ फेब्रुवारी रोजी रात्री शशांक धाबेकर हा तरुण टँकरच्या मागील चाकाखाली आल्यामुळे मृत्यूमुखी पडला होता. यानंतरही शहर वाहतूक शाखेकडून प्रतिबंधात्मक उपाययोजना होत नसल्याचे दिसून येत आहे.
-----