कर्नाटकातून हापूस आंब्याची मार्केट यार्डात पहिली आवक

मार्केट यार्ड, ता. १६ : गुलटेकडी मार्केट यार्डात कर्नाटकातून हापूस आंब्याची पहिली आवक झाली आहे. दरवर्षी कोकणातून पहिली आवक होत असते. रोहन सतीश उरसळ यांच्या गाळ्यावर कर्नाटक येथील शेतकरी जी. एम. शफीउल्ला यांच्या शेतातून सहा पेट्यांची आवक झाली. चार डझनाच्या पेटीला लिलावात ५ हजार १०० रुपये भाव मिळाला.
सुरेश केवलाणी आणि बोनी रोहरा यांनी या पेटीची खरेदी केली. त्यावेळी सतीश उरसळ, आडते असोसिएशनचे माजी उपाध्यक्ष युवराज काची यांच्यासह अन्य आडतदार उपस्थित होते. दोन दिवसांपूर्वी रविवारी (ता. १४) कर्नाटक येथून लालबाग आंब्याची आवक झाली होती. त्यानंतर आता हापूसचीही आवक सुरू झाली आहे. नेहमीच्या तुलनेत २० ते २५ दिवस आधीच ही आवक झाली आहे. मागील वर्षीच्या तुलनेत ३० टक्के अधिक भाव मिळाला आहे. हवामान बदलामुळे मागील वर्षी कर्नाटक येथील पिकांचे नुकसान झाले होते. त्यामुळे आवक कमी झाली होती. मात्र, यंदा अधिक आवक होण्याचा अंदाज वर्तविण्यात येत आहे. फेब्रुवारीत तुरळक आवक होईल. दरवर्षी एप्रिलमध्ये हंगाम सुरू होतो. मात्र, यंदा तो मार्चमध्येच सुरू होण्याचा अंदाज आहे. मालाचा दर्जा चांगला असल्याचेही यावेळी सांगण्यात आले.
------

‘‘पोषक हवामानामुळे यंदा कर्नाटकातील हापूस आंब्याचे उत्पादन चांगले झाले आहे. त्यामुळे नेहमीपेक्षा लवकर हापूसची आवक सुरू झाली असून, यंदा एकूण आवक जास्त राहण्याचा अंदाज व्यक्त आहे.
-रोहन उरसळ, कर्नाटक आंब्याचे व्यापारी

फोटो ः 06020