ज्यादा परताव्याच्या आमिषाने फसवणूक

जादा परताव्याच्या आमिषाने
२४.५० लाखांची फसवणूक
सहाजणांविरुद्ध अकलूज पोलिसांत गुन्हा
सकाळ वृत्तसेवा
अकलूज, ता. १५ : पैसे गुंतवणुकीवर अधिक परतावा देण्याचे आमिष दाखवून २४ लाख ५० हजारांहून अधिक रकमेची फसवणूक करणाऱ्या कंपन्यांसह सहा जणांविरुद्ध अकलूज पोलिस ठाण्यात गुन्हा दाखल झाला आहे.
इन्फिनिटी बीकॉन फायनान्शिअल सर्व्हिसेस, आय बी प्रो डेस्क कंपनी, मास्टर सिनर्जी एज्युटेक एलएलपी या कंपन्यांकडून फिर्यादी महिलेस २४ लाख ५० हजार आणि इतर १४ गुंतवणूकदारांकडून मोठ्या प्रमाणात गुंतवणूक घेऊन त्यांना कोणताही परतावा न देता तसेच त्यांची गुंतवणूक रक्कम परत न देता फिर्यादी व गुंतवणूकदारांची खूप मोठी आर्थिक फसवणूक केली. याबाबत कंपनीचे संचालक व एजंट नवनाथ जगन्नाथ अवताडे व शुभम नवनाथ अवताडे, सुवर्णा नवनाथ अवताडे (तिघेही रा. फळवणी, सध्या रा. राजश्री शाहू सोसायटी, बिबवेवाडी, पुणे), अशोक पवार, उमा पवार, आदेश पवार (तिघेही रा. उघडेवाडी, ता. माळशिरस, जि. सोलापूर) यांच्या विरुद्ध अकलूज पोलिस ठाण्यात फसवणुकीचा गुन्हा दाखल करण्यात आला आहे.
या गुन्ह्याचा अधिक तपास पोलिस अधीक्षक अतुल कुलकर्णी, अपर पोलिस अधीक्षक प्रीतम यावलकर, उपविभागीय पोलिस अधिकारी संतोष वाळके, पोलिस निरीक्षक नीरज उबाळे यांच्या मार्गदर्शनाखाली सहायक पोलिस निरीक्षक योगेश लंगुटे, पोलिस हेड कॉन्स्टेबल अमोल बकाल, समीर पठाण हे करीत आहेत.
---
पोलिस प्रशासनाचे आवाहन
यातील आरोपींनी सोलापूर, पुणे, अहिल्यानगर जिल्ह्यातील अनेक जणांकडून मोठ्या प्रमाणे गुंतवणूक रकमा स्वीकारल्याचे तपासामध्ये निष्पन्न होत असून, त्याची व्याप्ती मोठी आहे. यातील गुंतवणूकदार व आरोपींची संख्या वाढण्याची शक्यता आहे. त्यामुळे वरील कंपन्या किंवा अशा प्रकारच्या कंपन्यांमध्ये गुंतवणूक केलेल्या गुंतवणूकदारांनी त्यांची फसवणूक झाली असल्यास त्यांच्या गुंतवणुकीच्या कागदपत्रांसह अकलूज पोलिस ठाण्यास तत्काळ संपर्क साधावा, असे आवाहन पोलिस प्रशासनाकडून करण्यात आले आहे.